नेचासल्यान गाउँपालिकाले वी.पी. कोइराला संस्कृत विद्यापीठका विद्यार्थीलाई आवास र भोजनको व्यवस्था गर्ने

जेठ ८, सोलुखुम्बु । सोलुखुम्बुको नेचासल्यान गाउँपालिका वडा नम्बर २ मा अवस्थित विश्वेश्वर प्रसाद कोइराला संस्कृत विद्यापीठमा अध्ययनरत विद्यार्थीहरूका लागि गाउँपालिकाले महत्वपूर्ण निर्णय लिँदै आवास तथा भोजनको व्यवस्था गर्ने भएको छ । गाउँपालिका अध्यक्ष धनजन राईले आज उक्त निर्णयप्रति स्पष्ट प्रतिबद्धता जनाउँदै आगामी आर्थिक वर्षदेखि नियमित बजेट व्यवस्थापनमार्फत कार्यक्रम सञ्चालन गरिने जानकारी दिनुभयो । यस्तै उपाध्यक्ष विना राइले यस क्याम्पसको दीगो संचालकन तथा व्यवस्थापनको लागि नितिगत व्यवस्थापन गरिएको बताउनु भयो ।

चालु आर्थिक वर्षमै पनि केही हदसम्म सम्बोधन गर्ने योजना रहेको र आगामी दिनमा थप छात्रवृत्तिको व्यवस्था गरिने वडा नम्बर २ का अध्यक्ष सिताराम काफ्लेले जानकारी दिनुभयो । पूर्वमन्त्री एवं विद्यापीठका संरक्षक बलबहादुर के.सी. को उपस्थितिमा गत साता सम्पन्न छलफलमा कम्तीमा १० जना विद्यार्थीका लागि गुरुकुल पद्धतिअनुसार शास्त्री तहको अध्यापनको व्यवस्था गरिने निर्णय गरिएको थियो ।

सो निर्णयअनुसार आज विद्यापीठका निमित्त प्राचार्य उप–प्राध्यापक पशुपतिकुमार ढुंगाना र प्रशासन प्रमुख लोकेन्द्र बहादुर राउतले गाउँपालिका अध्यक्ष राई समक्ष कार्ययोजना प्रस्तुत गर्नुभएको हो । हाल विद्यापीठमा ४१ भन्दा बढी विद्यार्थीहरू नियमित अध्ययनरत छन् । धेरै विद्यार्थीहरू टाढा–टाढाबाट आएर अध्ययन गरिरहेका कारण आवास तथा खानपानको समस्या झेल्दै आएका थिए । गाउँपालिकाको यस सहयोगबाट अब विद्यार्थीहरूलाई ठूलो राहत मिल्ने विश्वास लिइएको छ । प्राचार्य ढुंगानाले यस पहललाई ऐतिहासिक कदमको संज्ञा दिँदै धन्यवाद ज्ञापन गर्नुभएको छ ।

उहाँले भन्नुभयो, “यस सहयोगले विद्यार्थीहरूलाई अध्ययनमा केन्द्रित हुन थप प्रेरणा दिनेछ। संस्कृतजस्ता मौलिक ज्ञान प्रणालीहरूलाई जगेर्ना गर्न यस्ता कदम आवश्यक छन् ।” विद्यार्थी, अभिभावक तथा समाजसेवीहरू सबैले गाउँपालिकाको यो निर्णयप्रति प्रशंसा व्यक्त गर्दै संस्कृत शिक्षा प्रवद्र्धनमा स्थानीय तहबाट देखिएको चासो र सक्रियतालाई अत्यन्त सकारात्मक संकेतको रूपमा लिएका छन् ।