आर्थिक वर्ष २०८२/०८३ का लागि ऐसेलुखर्क गाउँपालिकाको बजेट र कार्यक्रम सम्बन्धी सुझाव माग

जेठ १०, सोलुखुम्बु । आगामी आर्थिक वर्ष २०८२/०८३ का लागि ऐसेलुखर्क गाउँपालिकाले बजेट तथा कार्यक्रम तर्जुमा प्रक्रिया प्रारम्भ गरेको छ। यसै सन्दर्भमा गाउँपालिकाले स्थानीय नागरिक, संघसंस्था, राजनीतिक दल, नागरिक समाज तथा सरोकारवाला पक्षहरूसँग राय तथा सुझाव संकलन गर्न सार्वजनिक अपिल जारी गरेको छ। गाउँपालिकाका प्रमुख प्रशासकीय अधिकृत रेख बहादुर थापाद्वारा हस्ताक्षरित सूचनामा आर्थिक वर्ष २०८२/०८३ को नीति, कार्यक्रम तथा बजेट निर्माण कार्य अघि बढिरहेको उल्लेख गरिएको छ।

सूचनामा भनिएको छ, “गाउँपालिकाको विकास योजना, पूर्वाधार निर्माण, सामाजिक सेवा, कृषि, शिक्षा, स्वास्थ्य, रोजगारी, उद्यमशीलता तथा स्थानीय आर्थिक विकासका क्षेत्रमा समेट्न सकिने कार्यक्रमका लागि उपयुक्त राय सुझाव उपलब्ध गराउन सबैमा अनुरोध गरिन्छ।”

सुझावहरू आगामी असार ५ गते भित्र लिखित वा ईमेलमार्फत गाउँपालिकाको कार्यालयमा बुझाउन सकिने जनाइएको छ। प्राप्त सुझावहरूलाई प्राथमिकताका आधारमा विश्लेषण गरी गाउँसभामा प्रस्तुत गरिने बताइएको छ। यस पहलबाट स्थानीय जनताको सरोकारलाई बजेट तथा कार्यक्रममा समावेश गर्दै उत्तरदायी र समावेशी योजना निर्माणमा टेवा पुग्ने अपेक्षा गरिएको छ।