सावा खोलामा मोटरेबल पुलको उद्घाटन, तीन गाउँपालिकाका स्थानीय लाभान्वित

जेठ १०, सोलुखुम्बु । खोटाङको खोटेहाङ गाउँपालिका र जन्तेढुंगा गाउँपालिकालाई जोड्ने महत्वपूर्ण मोटरेबल पक्की पुलको उद्घाटन गरिएको छ । खोटेहाङ गाउँपालिका–७ को खोटाङ बजार मझौ र जन्तेढुंगा गाउँपालिका–५ को चिसापानी छयालिसको सिमानामा पर्ने सावा खोलामा निर्माण गरिएको यो ४१.४० मिटर लम्बाइको प्रि–स्ट्रेस्ड आरसीसी पुल शनिबार एक कार्यक्रमकाबीच उद्घाटन गरिएको हो ।

कोशी प्रदेश सरकारअन्तर्गत भौतिक पूर्वाधार विकास मन्त्रालयको सशर्त बजेटबाट निर्माण सम्पन्न गरिएको सो पुलको उद्घाटन कोशी प्रदेशका भौतिक पूर्वाधार विकास तथा स्वास्थ्य मन्त्री भुपेन्द्र राईले गर्नुभएको हो । सुसम–आदित्य–विजय निर्माण सेवा, उदयपुरले मूल्य अभिवृद्धि कर तथा पिएससहित ८ करोड २१ लाख ७२ हजार ८९४ रुपैयाँमा निर्माण सम्पन्न गरेको हो । पुल निर्माणका लागि २०८० साल वैशाख ११ गते सम्झौता गरिएको थियो भने २०८२ वैशाख १० गतेभित्र निर्माण सम्पन्न गर्ने लक्ष्य राखिएको थियो ।

प्रादेशिक सडक पुल सहयोग एकाइ, इटहरीको प्राविधिक सहयोगमा निर्माण सम्पन्न भएको सो पुल खोटाङ बजार–चिसापानी सडकखण्डमा पर्दछ । पक्की पुल निर्माण हुनु अघि स्थानीय बासिन्दाहरूले सावा खोला पार गर्न झोलुङ्गे पुलको भर पर्ने गरेका थिए ।

अब भने पक्की पुल निर्माणपछि खोटेहाङ, जन्तेढुंगा तथा बराहपोखरी गाउँपालिकाका बासिन्दाहरूलाई आवागमनमा सहजता भएको छ । पुल उद्घाटन कार्यक्रममा बराहपोखरी गाउँपालिका अध्यक्ष शलिकराम बन्जारा, खोटेहाङ गाउँपालिका अध्यक्ष उदिमबहादुर राई, जन्तेढुंगा गाउँपालिका अध्यक्ष अरुणादेवी राई, खोटेहाङ उपाध्यक्ष रुपेश राई लगायतको उपस्थिति रहेको थियो ।