महाकुलुङका ९० विद्यार्थीलाई छात्रवृत्ति वितरण, ५ लाख ४० हजारको आर्थिक सहयोग

जेठ १०, सोलुखुम्बु । सोलुखुम्बुको महाकुलुङ गाउँपालिकामा महाकुलुङ पेल्माङ विकासका लागि सहयोगी हातहरु संस्थाले आर्थिक रुपमा कमजोर, फरक क्षमता भएका, अनाथ तथा अन्य पिछडिएका समुदायका ९० जना विद्यार्थीलाई छात्रवृत्ति हस्तान्तरण गरेको छ । शनिबार एक कार्यक्रमका बीच महाकुलुङ गाउँपालिका वडा नम्बर २ स्थित विभिन्न विद्यालयमा अध्ययनरत विद्यार्थीहरूलाई जनही ६ हजार रुपैयाँका दरले छात्रवृत्ति वितरण गरिएको हो ।

कुल ५ लाख ४० हजार रुपैयाँ बराबरको आर्थिक सहयोग प्रदान गरिएको वडा अध्यक्ष प्रदीप राईले जानकारी दिनुभयो । छात्रवृत्तिको रकम जर्मनीस्थित पेल्माङ ईभी संस्था, गोर्लिजको सहयोगमा जुटाइएको सहकर्मी झलक राईले जानकारी दिनुभयो । कार्यक्रममा वडा अध्यक्ष राईसहित वडा सदस्यहरू, स्थानीय समाजसेवीहरू तथा अभिभावकहरूको उपस्थिति रहेको थियो ।

संस्थाका अध्यक्ष मछिन्द्र राईका अनुसार संस्थाको मुख्य उद्देश्य विपन्न तथा सीमान्तकृत विद्यार्थीहरूलाई शिक्षामा सक्रिय रहन प्रेरित गर्नु हो। उहाँले भन्नुभयो, हामीले शिक्षा मात्रै होइन, स्वास्थ्य तथा पूर्वाधार विकासमा पनि निरन्तर काम गर्दै आएका छौं । संस्थाले अहिलेसम्म ६ पटकसम्म निःशुल्क स्वास्थ्य शिविर सञ्चालन गरिसकेको छ ।

त्यसैगरी शिक्षक अनुदान, विद्यालयमा प्रोजेक्टर तथा फर्निचर सहयोग, सिकिस्त बिरामीको हेलिकप्टरमार्फत उद्धार, र विपन्न परिवारहरूलाई तीन आर्थिक वर्षमा ४५ वटा जस्तापाताका छाना प्रदान गरिएको संस्थाले जनाएको छ । स्थानीयस्तरमै प्रभावकारी सामाजिक काम गर्दै आएको यो संस्था आगामी दिनहरूमा अझ फराकिलो रुपमा विकास सहयोग गर्ने प्रतिबद्धतासहित अगाडि बढ्ने जनाएको छ ।