खोटाङका सविन राई सुनकोशीमा बेपत्ता, खोजी कार्य जारी

जेठ १० सोलुखुम्बु । खोटाङको हलेसी तुवाचुङ नगरपालिका–२ डिकुवामा एक किशोर सुनकोशी नदीमा पौडी खेल्ने क्रममा बेपत्ता भएका छन् । डिकुवाका १६ वर्षीय सविन राई शनिबार बिहान करिब ११ बजे सुनकोशीले बगाएका हुन् । डिकुवा ओख्लाङका बिन्द्र केशर राईका छोरा सविन र १५ वर्षीय उनका साथी सागर राई धामी लिन भनेर ओख्लाङबाट डिकुवा जाँदै थिए ।

बाटोमा तुइम्बु बादरेखोप भन्ने स्थानमा पुगेपछि गर्मीका कारण कोशी नदीमा पौडी खेल्न पसेका उनीहरूबाट सविन बेपत्ता भएका हुन् । सँगै रहेका सागरले तत्कालै परिवारलाई खबर गरेका थिए । वडाध्यक्ष देबेन्द्र राईका अनुसार घटनापछि स्थानीयबासी र वडासदस्य सुर्ज अधिकारीको टोलीले खोजी कार्य सुरु गरेका छन् ।हालसम्म सविनको कुनै अत्तोपत्तो लागेको छैन् ।

घटनाको जानकारी पाएसँगै च्यास्मिटार प्रहरी चौकीबाट प्रहरी टोली घटनास्थलमा खटिएको जिल्ला प्रहरी कार्यालय खोटाङले जनाएको छ । सविन राई च्यास्मिटार माध्यमिक विद्यालयमा कक्षा १० मा अध्ययनरत रहेको विद्यालयका प्रधानाध्यापक तेजकुमार चाम्लिङ राईले जानकारी दिनुभयो । स्थानीयवासी, प्रहरी र जनप्रतिनिधिको संयुक्त टोलीद्वारा खोजी कार्य जारी छ ।