सोलुखुम्बुमा पत्रकार–प्रहरी भेटघाट, शान्ति सुरक्षामा सशक्त कदम चालिने प्रतिबद्धता

जेठ ११, सोलुखुम्बु । जिल्ला प्रहरी कार्यालय सोलुखुम्बुमा पत्रकार र प्रहरीबीच अन्तरक्रिया कार्यक्रम सम्पन्न भएको छ । आइतबार सम्पन्न उक्त विशेष कार्यक्रममा हालै जिल्लामा सरुवा भई आउनुभएका  प्रहरी नायव उपरीक्षक (डीएसपी) मनोजित कुँवरले जिल्लामा कार्यभार सम्हालेपछि पहिलोपटक सञ्चारकर्मीसँग भेटघाट गर्नुभएको हो ।

कार्यक्रममा डीएसपी कुँवरले जिल्लाको शान्ति सुरक्षा सुदृढ पार्ने, अपराध नियन्त्रणलाई प्रभावकारी बनाउने र लागुऔषधविरुद्ध कडाइका साथ अभियान सञ्चालन गर्ने प्रतिबद्धता व्यक्त गर्नुभयो । उहाँले सञ्चारकर्मीहरूसँग समन्वय गर्दै प्रहरी प्रशासन पारदर्शी र उत्तरदायी बनाउने संकेत गर्दै भन्नुभयो, “प्रहरीसँग सम्बन्धित कुनै पनि जानकारी गुप्त राखिने छैन, पत्रकारलाई दिन मिल्ने सुचनाहरु खुलेर जानकारी दिनेछौँ ।”

जिल्लाका क्रियाशिल संचारकर्मीहरूले पर्यटन सुरक्षा, हाइड्रोपावर परियोजनाहरूको लापरवाही, सडक सुरक्षाको अभाव, र लागुऔषधको बढ्दो समस्या लगायतका ज्वलन्त विषयमा प्रहरीको सक्रियता बढाउन आग्रह गरेका छन् ।

जिल्ला प्रहरी कार्यालय सोलुखुम्बुका प्रहरी निरीक्षक विकास राईका अनुसार पूर्व डीएसपी द्वारिका प्रसाद घिमिरेको सरुवा भएसँगै डीएसपी कुँवर हालै जिल्लामा कार्यरत हुनुभएको हो । कार्यक्रमले सञ्चारकर्मी र सुरक्षाकर्मीबीच विश्वासको वातावरण निर्माण गर्दै सहकार्यलाई मजबुत बनाउने अपेक्षा गरिएको छ ।