महाकुलुङमा विविध कार्यक्रमसहित विश्व पोषण दिवस मनाइयो

जेठ १४, सोलुखुम्बु । विश्व पोषण दिवस २०८२ को अवसरमा सोलुखुम्बुको महाकुलुङ गाउँपालिका वडा नम्बर १ स्थित सगरमाथा माध्यमिक विद्यालयको प्राङ्गणमा विविध सचेतनात्मक तथा सांस्कृतिक कार्यक्रमसहित दिवस मनाइएको छ । शुभ धनी कुलुङको अध्यक्षतामा सम्पन्न कार्यक्रमको प्रमुख अतिथि स्वास्थ्य शाखाका निमित्त प्रशासनिक अधिकृत हरिप्रसाद आचार्य रहनुभएको थियो ।

कार्यक्रममा जि फाउण्डेसनको आर्थिक तथा प्राविधिक सहयोग, महाकुलुङ गाउँपालिकाको समन्वय तथा पहाडी विकास तथा संरक्षण नेपालको आयोजनामा पोषण र स्वस्थ खाने बानीको अभ्यास प्रवद्र्धन गर्ने उद्देश्यले विभिन्न कार्यक्रमहरू सञ्चालन गरिएको जनाइएको छ । पहाडी बिकास तथा संरछ्ण समूह नेपालको कार्यक्रम अधिकृत जित्न जनम राईका अनुसार, विद्यालय तथा समुदायमा पोषण र स्वास्थ्यप्रति सचेतना फैलाउन कार्यक्रम सञ्चालन गरिएको हो ।

कार्यक्रममा विभिन्न विद्यालयका विद्यार्थीहरूले पोषण विषयक सांस्कृतिक प्रस्तुति, सामूहिक गीत तथा नृत्य प्रस्तुत गरेका थिए । साथै, बाल क्लबको नेतृत्वमा प्रतिभावान बालबालिकाहरूले पोषणसम्बन्धी जनचेतनामूलक प्रस्तुति दिएका थिए । स्वास्थ्यकर्मीहरूद्वारा बालबालिकामा स्वच्छ खानेपानी र पोषणबारे सचेतना फैलाउने उद्देश्यले विशेष प्रस्तुति दिइएको सहकर्मी झलक राईले जानकारी दिनुभयो । कार्यक्रमले पोषण र स्वस्थ जीवनशैलीको महत्वलाई समुदायमा प्रभावकारी रूपमा प्रस्तुत गर्न सफल भएको बताइएको छ । साथै यो कार्यक्रम साल्पा सिलिचो गाउँपालिका भोजपुरमा समेत आयोजना गरिएको छ ।