कोशी प्रदेश सभामा ‘भिजिट भिसा’ गीत गाएर गृहमन्त्रीको राजीनामाको माग, कांग्रेसको असन्तुष्टि

जेठ १५, सोलुखुम्बु । कोशी प्रदेश सभाको बैठकमा नेकपा माओवादी केन्द्रका सांसदले ‘भिजिट भिसामा’ बोलको गीत गाउँदा नेपाली कांग्रेसका सांसदले असन्तुष्टि जनाएका छन् । बुधबार बसेको प्रदेश सभा बैठककोे शून्य समयमा माओवादी केन्द्रका सांसद गोम्बू शेर्पाले गृहमन्त्री रमेश लेखकको राजीनामा माग गर्नुअघि ‘भिजिट भिसामा’ बोलेको गीत गाएर सुनाउनुभएको थियो ।

अहिले हाम्रो नेपाल सरकारको चालामाला हेर्दा एउटा गीतको याद आउँछ,’ यति भनेपछि उहाँले गीत गाउनुभएको थियो, ‘भिजिट भिसामा हजुर भिजिट भिसामा, भुईं छोड्ने उड्ने हजुर पश्चिम दिशामा ।’ गीत गाइसकेपछि उनले भिजिट भिसाको नाममा लुट मच्चाउनेलाई संरक्षण दिने व्यक्ति गृहमन्त्री रहेको बताउँदै पदमा बस्न अयोग्य रहेको बताउनु भएको थियो । सांसद शेर्पाले उहाँले गृहमन्त्रीको राजीनामा माग गर्दा कांग्रेस सांसदले असन्तुष्टि जनाउनुभएको थियो ।

गोम्बुपछि शून्य समयमा बोलेका कांग्रेस सांसद प्रदीप सुनुवारले भिजिट भिसा प्रकरणमा गृहमन्त्रीलाई अनावश्यक लान्छना लगाएको गुनासो गर्नुभयो । सत्तामा हुँदा ठिक र बाहिर हुँदा बेठिक भन्ने प्रवृति देखिएको भन्दै उहाँले अनावश्यक विवाद झिकेर व्यवस्थामाथि नै वितृष्ण फैलाउने काम भएको जिकिर गर्नुभयो ।