भुमे (वास) समूह भवनको अध्यक्ष राईद्वारा उद्घाटन

जेठ १५, सोलुखुम्बु । सोलुखुम्बुको माप्यदुधकोशी गाउँपालिका–६, वाप्सामा खालिङ राई समुदायको सांस्कृतिक महत्व बोकेको भुमे (वास) समूहको भवनको उद्घाटन गरिएको छ । वपुसे रितोङ्म्य जवजी जिफालाङ्म्य भुमे समूहको भवन गाउँपालिका अध्यक्ष बुद्धिकिरण राईले एक विशेष समारोहबीच उद्घाटन गर्नुभएको हो ।

संस्कृति र पहिचान संरक्षणका लागि महत्वपूर्ण मानिएको सो भवन निर्माणका लागि गाउँपालिकाले ११ लाख ३१ हजार रुपैयाँ बजेट विनियोजन गरेको थियो । साथै, स्थानीयवासी र विभिन्न संस्थागत तथा व्यक्तिगत सहयोगमार्फत भवन निर्माण सम्पन्न गरिएको हो । अध्यक्ष राईले वर्तमान युगमा संसार एउटा गाउँजस्तै भइसकेको सन्दर्भमा भाषा, संस्कार र संस्कृति संरक्षण गर्दै नयाँ पुस्तालाई हस्तान्तरण गर्न चुनौतीपूर्ण भइसकेको उल्लेख गर्नुभयो ।

त्यसैले आफ्नो पहिचान जोगाउन यस्ता संरचनाको आवश्यकता झनै बढेको बताउँदै, भवन निर्माण सम्पन्न भएकोमा खुसी व्यक्त गर्नुभयो । उक्त कार्यक्रममा उपाध्यक्ष गौरव राई विशिष्ट अतिथिको रूपमा सहभागी हुनुका साथै स्थानीय समुदायको उल्लेखनीय उपस्थिति रहेको थियो । उद्घाटन समारोहले राई समुदायको सांस्कृतिक चेतनामा थप ऊर्जा प्रदान गर्ने विश्वास व्यक्त गरिएको छ ।