वोङछु शेर्पा मेमोरियल अस्पताल बन्यो किशोर किशोरी मैत्री स्वास्थ्य संस्था

जेठ १६, सोलुखुम्बु । सोलुखुम्बुको सोलुदुधकुण्ड नगरपालिका वडा नम्बर १० मा अवस्थित वोङछु शेर्पा मेमोरियल अस्पताललाई किशोर किशोरी मैत्री स्वास्थ्य संस्था घोषणा गरिएको छ । शुक्रबार एक विशेष समारोहबीच नगरपालिकाका मेयर नाम्गेल जाङ्बु शेर्पाले किशोर मैत्री कोठाको रिबन काट्दै अस्पताललाई औपचारिक रूपमा किशोर किशोरी मैत्री स्वास्थ्य संस्था घोषणा गर्नुभएको हो ।

कार्यक्रममा बोल्दै मेयर शेर्पाले यो अस्पताल सोलुदुधकुण्ड नगरपालिकाको दोस्रो मुख्य स्वास्थ्य संस्था भएको उल्लेख गर्नुभयो । नगरपालिका किशोर किशोरीको स्वास्थ्यलाई अत्यन्तै गम्भीर रुपमा लिनका साथै यो उमेर समुह भविष्यका कर्णधारलाई आत्मसाथ गर्दै, नगरपालिका संवेदनशील भएर काम गर्ने प्रतिबद्धता व्यक्त गर्नुभयो ।

यसैगरी वडा नम्बर १० का अध्यक्ष होम बहादुर मगरले अस्पतालको समुचित व्यवस्थापनका लागि सबै पक्षसँग सहकार्य गर्दै जानुपर्ने आवश्यकता औंल्याउनुभयो । अस्पतालले किशोर किशोरी मैत्री स्वास्थ्य संस्था बन्नका लागि गोपनीयता सुनिश्चितता, अनुकूल भौतिक पूर्वाधार, सेवा समय लचिलो हुनु पर्ने, सूचना तथा परामर्श सेवा दिने, सामाजिक रुपमा कमजोर, अपाङ्गता भएका वा टाढा क्षेत्रका किशोर/किशोरीहरूलाई सेवा लिन सहज हुने व्यवस्था र सामुदायिक सहभागिता लगायतको मापदण्डहरु पूरा गरेपछि यसलाई औपचारिक रुपमा किशोर किशोरी मैत्री स्वास्थ्य संस्था घोषणा गरिएको हो ।