थुलुङ दुधकोशीमा कविता प्रतियोगिता सम्पन्न, ‘प्यालेस्टाइनी बालकको बयान’ प्रथम

जेठ १६, सोलुखुम्बु । थुलुङ दुधकोशी प्रज्ञा–प्रतिष्ठानको आयोजनामा सम्पन्न भएको बृहत् कवि गोष्ठी तथा जिल्ला स्तरीय कविता प्रतियोगितामा शम्भु निशब्दको कविता ‘प्यालेस्टाइनी बालकको बयान’ ले प्रथम स्थान हासिल गरेको छ । प्रतियोगितामा सोलुखुम्बु जिल्लाका विभिन्न स्थानबाट ६२ वटा कविता सहभागी भएका थिए ।

तीमध्ये लेखनाथ कटेलको कविता दोस्रो स्थानमा रहँदा, निर्मला बस्नेतको कविता तेस्रो भएको आयोजकले जानकारी दिएको छ । त्यस्तै, चौथो स्थान विनिता बस्नेत र लक्ष्मी काफ्लेले साझा रूपमा प्राप्त गरेका छन् । विजेताहरूलाई प्रमाणपत्रसँगै नगद पुरस्कार प्रदान गरिएको छ ।

पहिलो स्थान प्राप्त शम्भु निशब्दले ३० हजार रुपैयाँ, दोस्रो स्थानका लेखनाथ कटेलले २० हजार, तेस्रो स्थानका निर्मला बस्नेतले १५ हजार, र चौथो स्थान प्राप्त दुवै सहभागीले जनही ५ हजार रुपैयाँ प्राप्त गरेका छन् । प्रतिष्ठानका अनुसार प्रतियोगिताको उद्देश्य सोलुखुम्बु जिल्लामा साहित्यिक सिर्जनालाई प्रोत्साहन गर्नु र स्थानीय प्रतिभाहरूलाई सार्वजनिक रुपमा प्रस्तुत गर्ने अवसर दिनु रहेको थियो ।