मिर्गौला प्रत्यारोपणपछि सगरमाथा आरोहण गर्ने पेम्बा शेर्पालाई मन्त्री पौडेलद्वारा सम्मान

जेठ १६, सोलुखुम्बु । स्वास्थ्य तथा जनसङ्ख्या मन्त्री माननीय प्रदीप पौडेलले मिर्गौला प्रत्यारोपणपछिको अवस्थामा सगरमाथाको सफल आरोहण गर्ने सोलुखुम्बुका कीर्तिमानी पर्वतारोही पेम्बा शेर्पालाई सम्मान गर्नुभएको छ । शुक्रबार मन्त्रालयमा आयोजित एक विशेष कार्यक्रममा मन्त्री पौडेलले शेर्पाको अद्वितीय साहस, आत्मबल र प्रेरणादायी यात्राको उच्च मूल्याङ्कन गर्दै विश्वमै पहिलोपटक यस्तो कीर्तिमान बनाएकोमा बधाई तथा शुभकामना व्यक्त गर्नुभयो। उहाँले शेर्पाले रचेको इतिहास सम्पूर्ण अंगदाता तथा अंगप्रत्यारोपणका आवश्यकता राख्ने व्यक्तिहरूका लागि प्रेरणाको स्रोत बन्ने विश्वास व्यक्त गर्नुभयो ।

“मस्तिष्क मृत्युपछि अंगदान गर्न सकिन्छ भन्ने सन्देश अझै पनि आम जनतामा पुग्न सकेको छैन । पेम्बा शेर्पाजस्तो उदाहरणमार्फत हामी समाजमा सचेतना फैलाउन सक्छौं,” मन्त्री पौडेलले भन्नुभयो । कार्यक्रमका क्रममा मन्त्री पौडेलले सगरमाथा आरोहणजस्ता जोखिमयुक्त अभियानमा सम्लग्न भरियाहरू अझै पनि स्वास्थ्य बीमाबाट बञ्चित रहेको उल्लेख गर्दै उनीहरूको बीमाका लागि सरकारी तहबाट पहल थालिने स्पष्ट पार्नुभयो ।

पर्वतारोही शेर्पाले मिर्गौला प्रत्यारोपणपछि पनि आत्मबल र निष्ठा नघटेको जनाउँदै सगरमाथा आरोहणले आफूमा थप आत्मविश्वास र साहस बढेको बताउनुभयो । वैदेशिक रोजगारीका क्रममा मिर्गौला फेल भएपछि स्वदेश फर्किएका शेर्पाले तीन वर्षअघि सहिद धर्मभक्त राष्ट्रिय प्रत्यारोपण केन्द्रमा मिर्गौला प्रत्यारोपण गर्नुभएको थियो ।