स्व. रमेश बाबु थुलुङको स्मृतिमा छात्रवृत्ति वितरण तथा शालिक माल्यार्पण कार्यक्रम सम्पन्न

जेठ १७, सोलुखुम्बु । सोलुखुम्बुको थुलुङ दुधकोशी गाउँपालिका–१ निवासी स्वर्गीय रमेश बाबु थुलुङको चौथो पुण्य तिथिको अवसरमा आयोजित शालिक माल्यार्पण तथा छात्रवृत्ति वितरण कार्यक्रम सफलतापूर्वक सम्पन्न भएको छ । हिम शिखर केयरने अस्टिनोभ स्कुलको आयोजनामा गरिएको उक्त कार्यक्रममा स्थानीय बौद्धिक वर्ग, शिक्षा क्षेत्रका अग्रज, समाजसेवी तथा सुरक्षाकर्मीको उल्लेखनीय उपस्थिति रहेको थियो ।

स्वर्गीय रमेश बाबु थुलुङको नाममा स्थापित “रमेश बाबु थुलुङ स्मृति छात्रवृत्ति कार्यक्रम” अन्तर्गत यस वर्ष कक्षा ६ की छात्रा अनुजा बस्नेत, कक्षा ४ की होमकुमारी भुजेल र कक्षा २ की सन्ध्या राईलाई क्रमशः २४ हजार ९ सय ६०, २२ हजार ५ सय ६० र २० हजार १ सय ६० रुपैयाँ प्रदान गरिएको छ । कुल ६७ हजार ६ सय ८० रुपैयाँ बराबरको छात्रवृत्ति वितरण गरिएको यस कार्यक्रमको प्रमुख उद्देश्य शिक्षा क्षेत्रमा असल प्रेरणा र अवसर सिर्जना गर्नु हो । कार्यक्रममा हिम शिखर केयरने अस्टिनोभ स्कुलका विद्यालय व्यवस्थापन समितिका अध्यक्ष बीर बहादुर गुरुङको अध्यक्षता तथा स्व. थुलुङका सुपुत्र रोशन बाबु थुलुङको प्रमुख आतिथ्य रहेको थियो ।

रोशन बाबु थुलुङले स्मृतिमा आयोजना गरिने यस कार्यक्रमले शिक्षा क्षेत्रमा सशक्त प्रभाव पार्ने विश्वास व्यक्त गर्नुभयो । साथै आफु अन्य संस्थाहरुमा आबद्ध भएर पालिका भित्रका नागरिकहरुको सेवाका लागि स्वास्थ्य, शिक्षा लगायत क्षेत्रमा योग्दान गरिरहेको बताउनुभयो । स्मृति शालिकमा माल्यार्पण गर्दै वक्ताहरुले स्व. थुलुङको सामाजिक सेवाप्रति समर्पित योगदानको उच्च मूल्याङ्कन गरेका छन् ।

कार्यक्रममा जिवन ज्योति मावि नेलेका विव्यस अध्यक्ष खड्ग बहादुर बस्नेत, विद्यालयका प्रधानाध्यापक दयाराज बस्नेत, समाजसेवी इन्द्र बहादुर खड्का र कुमार खड्का, नेले युथ क्लबका अध्यक्ष साजन गुरुङ, प्रहरी चौकी इन्चार्ज चन्द्र कार्की लगायत विविध क्षेत्रका व्यक्तिहरुको उपस्थिति रहेको थियो ।

उक्त कार्यक्रमले समाजमा सकारात्मक सन्देश फैलाएको छ कि शिक्षा र सामाजिक योगदानले व्यक्तिलाई मृत्युपछि पनि अमर बनाउँछ । स्व. रमेश बाबु थुलुङको स्मृतिमा सुरु गरिएको यो कार्यक्रम आगामी दिनमा पनि निरन्तरता दिइने आयोजकले जानकारी दिएका छन् ।