फाप्लु अस्पताललाई ५० शैयाको बनाउन पहल शुरु : समन्वय प्रमुख निरौला

जेठ १७, सोलुखुम्बु । जिल्ला समन्वय सोलुखुम्बुका प्रमख कृष्णप्रसाद निरौलाले जिल्ला अस्पताल फाप्लुलाई स्तरउन्नती गरि ५० शैयाको बनाउन पहल थालिएको बताउनु भएको छ । अस्पतालको सामाजिक परिक्षण प्रतिवेदन सार्वजनिक गर्न आयोजित कार्यक्रममा अस्पताल विकास समितिका अध्यक्ष समेत रहनु भएका समन्यव प्रमुख निरौलाले हाल १५ शैयाको अस्पताललाई ५० शैयाको बनाउनका लागि अस्पताल ब्यवस्थापन समिति बाटै निर्णय भएको बताउनु भयो ।

वहाँले ल्याबको अत्याधुनिक प्रविधिक खरिदको लागि समेत निर्णय गरिएको भन्दै अस्पतालमा चाँडै आधुनिक ल्याब संचालनमा ल्याउने बताउनु भयो । अस्पतालकी निमित्त प्रमुख डा. श्रेया पंगेनीको सभापतित्वमा भएको कार्यक्रममा सोलुदुधकुण्ड नगर पालिकाका प्रबक्ता फुर्वाग्याल्जेन शेर्पाले नगरपालिकाको अस्पतालको निर्माण र ब्यवस्थापनमा महत्वपूर्ण भूमिका निर्वाह गरेको बताउनु भयो ।

कार्यक्रममा सहभागिहरु निशुल्क पाउनु पर्ने औषधीको पर्याप्त उपलब्धता, विशेषज्ञ स्तरीय स्वास्थ्य सेवा लगायतका सवाल उठाएका थिए । सामाजिक परिक्षणको क्रममा अस्पतालमा एम्बुलेन्स नभएको, ब्लड बैंक नभएको जस्ता सुधार्नु पर्ने विषय औँल्याईएको थियो ।