नेपाल शिक्षक महासंघ सोलुखुम्बुमा नेतृत्वको पूर्णताः स्थानीय शिक्षा अभियानमा नयाँ ऊर्जा

जेठ १७, सोलुखुम्बु । लामो समयदेखि अपूर्ण रहेको नेपाल शिक्षक महासंघ सोलुखुम्बुको कार्यसमिति शनिबार पूर्णता पाएसँगै स्थानीय शिक्षक आन्दोलनमा नयाँ उत्साह थपिएको छ । सल्लेरीमा आयोजित विशेष कार्यक्रममार्फत जनक कुमार थापाको अध्यक्षतामा रहेको समिति औपचारिक रूपमा सार्वजनिक गरिएको हो ।

समितिमा सागर तामाङ उपाध्यक्ष, सुर्य बहादुर बस्नेत सचिव, र सदस्यहरूमा सुरेश वास्तोला, मनिता, र खेमराज कटेल रहेका छन्। समितिमा कूल २० जना सदस्य रहेका छन् । एक वर्षअघि गठन भए पनि विविध कारणले अपूर्ण रहँदै आएको समितिलाई अन्ततः पूर्णता दिइएको हो । कार्यक्रममा नेपाल शिक्षक महासंघका राष्ट्रिय सदस्य नारायण प्रसाद वास्तोला प्रमुख अतिथि रहनुभएको थियो । उहाँले विगतको तुलनामा हाल शिक्षकहरूको पक्षमा काम गर्ने वातावरण सहज हुँदै गएको भन्दै संघको भूमिकालाई अझ सशक्त बनाउन सुझाव दिनुभयो ।

यस्तै नेपाल शिक्षक संघका अध्यक्ष मदन राईले समितिको पूर्णतालाई ‘ऐतिहासिक दिन’ को संज्ञा दिँदै अब शिक्षकमैत्री नीति निर्माण र लागू गर्न दबाब दिने मार्ग खुला भएको धारणा राख्नुभयो । नेपाल राष्ट्रिय शिक्षक संगठनका अध्यक्ष खिलक कार्कीले सरकारले ल्याएको शिक्षा बजेटबारे अझ स्पष्टता आउनुपर्ने बताउँदै शिक्षकहरूलाई अन्योलमा नराख्न सरकारसँग आग्रह गर्नुभयो ।

कार्यक्रमको सभाध्यक्ष तथा नवगठित समितिका अध्यक्ष जनक कुमार थापाले ढिलो भए पनि समिति पूर्णता पाएकामा खुसी व्यक्त गर्दै अब कार्य सञ्चालनमा थप सहजता आउने विश्वास व्यक्त गर्नुभयो । कार्यक्रममा सहभागी शिक्षकमाझ नवगठित नेतृत्वलाई बधाई तथा शुभकामनासहित भविष्यमा सशक्त क्रियाशीलता देखाउन प्रेरणा प्रदान गरिएको थियो ।