जिल्ला अस्पताल खोटाङको पहिलो सामाजिक परीक्षण मस्यौदा प्रतिवेदन सार्वजनिक

जेठ १७, सोलुखुम्बु । जिल्ला अस्पताल खोटाङको स्थापनायता पहिलोपटक सामाजिक परीक्षणको मस्यौदा प्रतिवेदन सार्वजनिक गरिएको छ । अस्पतालको सेवा, पारदर्शिता, जवाफदेहिता तथा सेवाग्राहीको सहभागिता अभिवृद्धि गर्ने उद्देश्यले सामाजिक परीक्षण गरिएको हो ।

पूर्वाञ्चल विश्वविद्यालयका उपप्राध्यापक डा. पुकार चौधरीद्वारा सामाजिक विकास तथा अनुसन्धान केन्द्र, विराटनगरको संयोजनमा तयार पारिएको प्रतिवेदन शुक्रबार जिल्ला समन्वय समितिको सभाहलमा प्रस्तुत गरिएको हो । प्रतिवेदनमा चालू आर्थिक वर्षको कार्य प्रगति, सेवा प्रवाह, सेवाग्राहीको अनुभव, सन्तुष्टि र असन्तुष्टिको अवस्था, सुधार सुझाव, तथा अस्पताल परिसरमा टाँगिएका जानकारीमूलक सामग्रीहरुको विवरण समावेश गरिएको छ ।

डा. चौधरीका अनुसार प्रतिवेदन तयार गर्न अस्पतालको विवरण मात्र नभई सेवाग्राहीहरुसँग स्थलगत अन्तर्वार्ता पनि गरिएको थियो । गत फागुनबाट सुरु भएको सामाजिक परीक्षणको सम्पूर्ण प्रक्रिया चालू आर्थिक वर्षभित्रै सम्पन्न गरी अन्तिम प्रतिवेदन अस्पताललाई बुझाइने जानकारी दिइएको छ । कार्यक्रममा अस्पताल सञ्चालन तथा व्यवस्थापन समिति अध्यक्ष सनबहादुर राईको अध्यक्षता रहेको थियो । कार्यक्रममा दिक्तेल रुपाकोट मझुवागढी नगरपालिकाका मेयर तीर्थराज भट्टराई, प्रमुख जिल्ला अधिकारी नरहरि घिमिरे, प्रहरी नायब उपरिक्षक प्रतिक विष्ट, विभिन्न राजनीतिक दलका प्रतिनिधि, संघसंस्थाका प्रमुख तथा सञ्चारकर्मीहरुको उपस्थिति थियो ।

गुनासो र सुझावलाई मनन गर्दै अस्पताल सेवा थप प्रभावकारी बनाइने बताउँदै अध्यक्ष राईले सेवा प्रवाहमा देखिएको समस्याको एक कारण अस्पतालको नयाँ भवन निर्माण कार्य रहेको जानकारी दिनुभयो । अस्पतालका निमित्त प्रमुख मेडिकल सुपरिटेण्डेण्ट डा. रुपेश संग्रौलाले अघिल्ला दिनको तुलनामा सेवा प्रवाहमा उल्लेखनीय सुधार आएको र सामाजिक परीक्षणको प्रतिवेदनपछि अझ सुधार गर्ने प्रतिबद्धता व्यक्त गर्नुभयो ।