खच्चड चरिचरण रोक्न खिजिदेम्बा–९ को आग्रह

जेठ १७, सोलुखुम्बु । ओखलढुंगाको खिजिदेम्बा गाउँपालिका–९ ले सोलुखुम्बु सिमावर्ती क्षेत्रहरूमा खच्चड चरिचरण बन्द गर्न आग्रह गरेको छ । वडा कार्यालयले एक सार्वजनिक सूचना जारी गर्दै स्थानीय वनस्पति, जडिबुटी र धार्मिक–पर्यटकीय क्षेत्रहरूमा क्षति पु¥याइरहेका खच्चडहरूको चरिचरण रोक्न सबैलाई अनुरोध गरेको हो ।

वडाले तोलु गुम्बा, बुलबुले, लामुजे र छुटाँगा क्षेत्रका स्थानहरूमा विगत केही वर्षदेखि दैनिकरूपमा चरनका लागि छाडा छोडिएका खच्चडहरूले वातावरणमा दुर्गन्ध फैलाउनुका साथै जडिबुटी तथा वनस्पतिमा क्षति पु¥याएको जनाउँदै पटक–पटक स्थानीयबासीबाट गुनासो आएको जानकारी दिएको छ । वडा अध्यक्ष ङवाङ फुरी शेर्पाले स्थानीय सरकार सञ्चालन ऐन, २०७४ को दफा १२ को उपदफा १ को खण्ड (ख) को (२) अनुसार सूचनामार्फत जानकारी दिइएको बताउनुभयो ।

साथै, वडा कार्यालयको अनुमति वा समन्वयबिना यस्ता गतिविधि गरिएको पाइएमा स्थानीय प्रशासन ऐन, २०२८ को दफा ९ को उपदफा ११ र १२ बमोजिम कारबाही गरिने चेतावनी पनि दिइएको छ । वडाले उक्त सूचनालाई सबै खच्चड धनी, सरोकारवाला र स्थानीय नागरिकले पालना गर्न अनुरोध गर्दै, उल्लंघन भएमा कानूनी कारबाही अघि बढाइने स्पष्ट पारेको छ ।