खोटाङको दिक्तेल–खानीडाँडा–रेग्मीटार सडकमा मोटरेबल पुल निर्माण हुने

जेठ १७, सोलुखुम्बु । खोटाङको सदरमुकाम दिक्तेललाई पूर्वी तराईसँग जोड्ने दिक्तेल–खानीडाँडा–रेग्मीटार सडक अन्तर्गतको दिखुवा खोलामा मोटरेबल पुल निर्माण हुने भएको छ । शनिबार कोशी प्रदेशका भौतिक पूर्वाधार विकास मन्त्री भूपेन्द्र राईले पुल निर्माणको शिलान्यास गर्नुभएको हो ।

दिक्तेल रुपाकोट मझुवागढी नगरपालिका–४ खाल्ले र विजयखर्क–१५ को सिमानामा पर्ने उक्त खोलामा पुल नहुँदा विशेषगरी बर्खायाममा सवारी साधन आवतजावतमा कठिनाइ हुने गरेको थियो । अब उक्त समस्या समाधान हुने अपेक्षा गरिएको छ । पुल निर्माणका लागि करिब ५ करोड ५० लाख रुपैयाँ खर्च हुने अनुमान गरिएको छ ।

निर्माणका लागि आवश्यक स्टिल ट्रस्ट प्रदेश सडक पुल सहयोग इकाई इटहरीले उपलब्ध गराउनेछ । हालसम्म करिब २ करोड रुपैयाँ बराबरको स्टिल ट्रस्ट तयार भइसकेको र केही सामग्री शिलान्यासकै दिन निर्माणस्थलमा पु¥याइएको प्रमुख सूर्य नारायण चौधरीले जानकारी दिनुभयो ।

पुल निर्माण सम्पन्न भएसँगै ५९ किलोमिटर लामो दिक्तेल–रेग्मीटार सडकमा नियमित सवारी सञ्चालन सहज हुनेछ । हाल निर्माणाधीन दिक्तेल–खानीडाँडा–आहाले–रेग्मीटार सडक पुरानो मार्गभन्दा करिब १७.५ किलोमिटर छोटो छ । पुल निर्माणपछि खाद्यान्न, इन्धन, हार्डवेयर लगायतका उपभोग्य वस्तु ढुवानीमा सहजता आउने स्थानीय व्यवसायीहरूको भनाइ छ ।