जेठ १७, सोलुखुम्बु । सोलुखुम्बुको सोलुदुधकुण्ड नगरपालिकाले नगर क्षेत्रभित्रको सडक विस्तार, निर्माण तथा व्यवस्थापन कार्यलाई प्रभावकारी बनाउनका लागि नयाँ सडक मापदण्ड निर्धारण गरी कार्यान्वयनमा ल्याएको जनाएको छ । नगरपालिकाले हाल मापदण्ड विपरीत स्वीकृति नलिई मनोमानी रूपमा अस्थायी तथा स्थायी प्रकृतिका घर, टहरा, पर्खाल, पसल तथा अन्य संरचना निर्माण गर्ने क्रम तीव्र रूपमा बढ्दै गएको भन्दै गम्भीर ध्यानाकर्षण भएको जनाएको छ ।
यसै सन्दर्भमा नगरपालिका क्षेत्रभित्र स्वीकृति नलिई तथा मापदण्ड विपरीत कुनै पनि निर्माण कार्य गर्न कडाइका साथ निषेध गरिएको छ । नगरपालिका प्रशासनले सम्पूर्ण नगरबासी, निर्माणकर्ताहरू, सम्बन्धित निकायहरू तथा सरोकारवालाहरूलाई निर्माण कार्य अघि आवश्यक स्वीकृति र अनुमतिपत्र अनिवार्य रूपमा लिन अपिल गरेको छ ।
नगरपालिकाको सूचनामा स्पष्ट रूपमा भनिएको छ कि नियमविपरीत निर्माण गरिएको पाइएमा ती संरचना हटाउने, भत्काउने तथा कानुनी कारबाही प्रक्रिया अगाडि बढाइनेछ। त्यसबाट उत्पन्न सम्पूर्ण क्षतिको जिम्मेवारी सम्बन्धित व्यक्ति स्वयंले लिनुपर्नेछ । साथै, यो सूचना उल्लंघन गर्नेहरूमाथि विद्यमान ऐन, नियम तथा कार्यविधिअनुसार कडा कानुनी कारबाही गरिने नगरपालिकाले चेतावनी दिएको छ । नगरपालिकाले शहरी विकास र जनसुरक्षाको दृष्टिकोणले मापदण्ड पालन अति आवश्यक रहेको भन्दै सबै पक्षलाई संयमित र जिम्मेवार व्यवहार गर्न आग्रह गरेको छ ।
Discussion about this post