कोशी लोकमार्गको फेदी खण्डमा एकतर्फी यातायात सञ्चालन सुरु

जेठ १७, सोलुखुम्बु । लेउती खोलामा शनिबार बिहान आएको बाढीले क्षति पुर्‍याएको कोशी लोकमार्गको फेदी खण्डमा मर्मतपछि एकतर्फी रुपमा यातायात सञ्चालन गरिएको छ। धनकुटाको साँगुरीगढी गाउँपालिका–६ फेदी भन्ने स्थानमा बाढीले करिब सय मिटर सडक बगाएको थियो।

क्षतिग्रस्त क्षेत्रमा शनिबार दिनभर मर्मत कार्य गरी साँझदेखि एकतर्फी रुपमा सवारी साधन चलाउन दिइएको जिल्ला प्रहरी कार्यालय धनकुटाका निमित्त प्रवक्ता, प्रहरी निरीक्षक ध्रुवनारायण श्रेष्ठले जानकारी दिनुभयो । उक्त घटनापछि कोशी प्रदेश सरकारका आन्तरिक मामिला तथा कानुन मन्त्री रेवतीरमण भण्डारीले क्षतिग्रस्त क्षेत्रको अनुगमन गरेका छन् ।

मन्त्री भण्डारीले कोशी प्रदेश सरकारको तर्फबाट घटनास्थलको निरीक्षण गर्दै सडक सुरक्षाका उपाय तत्काल प्रभावकारी रुपमा अगाडि बढाउन सम्बन्धित निकायलाई निर्देशनसमेत दिएका छन्। स्थानीय प्रशासन र निर्माण टोलीको सक्रियतामा अल्पकालीन मर्मत गरी हाललाई एकतर्फी यातायात सञ्चालन गरिएको भए पनि स्थायी पुनर्निर्माणका लागि थप योजना आवश्यक रहेको स्थानीय अधिकारीहरुले जनाएका छन्।