माप्यमा रक्षामन्त्री राईद्धारा राप्छा वास योङ्कमको उद्घाटन

जेठ १९, सोलुखुम्बु । सोलुखुम्बुको माप्यदुधकोशी गाउँपालिका–२ मा रहेको राप्छा वास योङ्कमको उद्घाटन संघीय सरकारका रक्षामन्त्री मानविर राईले गर्नु भएको छ । संघीय सरकारबाट विनियोजित २२ लाख ५० हजार रुपैयाँको लागतमा निर्माण गरिएको यो संरचना खालिङ राई समुदायको सांस्कृतिक र धार्मिक परम्परा संरक्षणका लागि निर्माण गरिएको हो । उद्घाटन कार्यक्रममा रक्षामन्त्री राई प्रमुख अतिथिका रूपमा सहभागी हुनु भएको थियो भने कार्यक्रमको अध्यक्षता राप्छा वास विकास समितिका अध्यक्ष आनन्द कुमार राईले गर्नुभएको थियो ।

त्यस्तै, गाउँपालिका अध्यक्ष बुद्धिकिरण राई र उपाध्यक्ष गौरव राईको विशेष आतिथ्यता रहेको थियो । राप्छा वास योङ्कम खालिङ राईहरुको संस्कार अनुसार पुजापाठ पछि प्रसाद ग्रहण बार्नु पर्ने नियम भएकाले पूर्खाहरुको सम्मानका लागि र उहाँहरुको सहजताका लागि बनाइएको घर हो । यसले स्थानीय संस्कृति, धर्म र पुर्खा स्मरणका कार्यलाई प्रवद्र्धन गर्ने विश्वास गरिएको छ । उद्घाटन समारोहमा खालिङ संस्कार अनुसारको झाँकी नाच, भूमे पूजा जस्ता सांस्कृतिक कार्यक्रम प्रस्तुत गरिनुका साथै जग्गा दाता व्यक्तिहरूलाई सम्मान पनि गरिएको थियो । रक्षामन्त्री राईले उद्घाटन समारोहमा सम्बोधन गर्दै स्थानीय संस्कृति र परम्पराको संरक्षण सरकारको प्राथमिकता रहेको उल्लेख गर्नु भयो ।

साथै उहाँले सामुदायिक एकता र पहिचानको संवद्र्धनमा यस्ता संरचनाहरूले महत्वपूर्ण भूमिका खेल्ने बताउनु भयो । राप्छा वास योङ्कमको निर्माणले खालिङ राई समुदायको मौलिकता झल्काउने मात्र नभई भावी पुस्ताका लागि संस्कृति हस्तान्तरण गर्ने थलोको रूपमा समेत योगदान गर्ने गाउँपालिकाका अध्यक्ष बुद्धिकिरण राईले विश्वास व्यक्त गर्नुभएको छ । यस्तै उपाध्यक्ष गौरव राईले यस्ता संरचनाहरुले स्थानीय संस्कृति र परम्पराको संरक्षणमा उल्लेखनीय योगदान दिने बताउनुभयो । साथै, भविष्यमा पनि समुदायको मौलिकता जोगाउन यस्ता पहलहरू निरन्तर भइरहने विश्वास व्यक्त गर्नुभयो । कार्यक्रममा स्थानीय जनप्रतिनिधि, बुद्धिजीवी, र समुदायका अगुवाहरूको उल्लेख्य उपस्थिति रहेको थियो ।