सोलुखुम्बुमा स्वास्थ्य क्षेत्रको सामाजिक परीक्षण

जेठ १९, सोलुखुम्बु । सोलुखुम्बुमा स्वास्थ्य क्षेत्रको सामाजिक परीक्षण सम्पन्न गरिएको छ । जिल्ला आयुर्वेद स्वास्थ्य केन्द्र सोलुखुम्बुको आयोजनामा तथा वान स्टेप अहेड फाउण्डेशनको प्राविधिक सहयोगमा यो कार्यक्रम संचालन गरिएको हो । उक्त परीक्षण कार्यालयको आर्थिक वर्ष २०८१/८२ को मार्गदर्शन कार्यक्रम अन्तर्गत आयुर्वेद स्वास्थ्य केन्द्र तथा अस्पतालहरूमा न्यूनतम सेवा मापदण्ड सुधार गर्ने उद्देश्यले गरिएको थियो ।

कार्यक्रम जिल्ला आयुर्वेद स्वास्थ्य केन्द्र सोलुखुम्बुका निमित्त कार्यालय प्रमुख अमिन्द्र कुमार पंडितको अध्यक्षता तथा सहायक प्रमुख जिल्ला अधिकारी नरेन्द्र कुमार श्रेष्ठको प्रमुख आतिथ्यतामा सम्पन्न भयो । कार्यक्रममा सेवा सुविधाको पहुँच, स्रोत साधनको उपलब्धता र व्यवस्थापनसम्बन्धी विविध पक्षबारे विस्तृत छलफल गरिएको थियो । सहभागी सेवाग्राहीहरूले भौतिक संरचनाको सुधार, सुरक्षित खानेपानी, शौचालय व्यवस्थापनजस्ता आधारभूत आवश्यकतामा ध्यान दिन आग्रह गरेका छन् ।

कार्यक्रममा बोल्दै निमित्त प्रमुख पंडितले “सानातिना समस्याहरू कार्यालय स्तरमै समाधान गर्दै जानेछौं,” भन्दै नयाँ भौतिक संरचना निर्माणको लागि आगामी आर्थिक वर्षदेखि थप पहल गरिने प्रतिबद्धता जनाउनुभयो । सहायक प्रमुख जिल्ला अधिकारी श्रेष्ठले, “विगतमा बजेट विनियोजन भए पनि खर्च फ्रिज भएको थियो, अब व्यवस्थापन समिति र प्रतिनिधिहरूले जिम्मेवार बन्नुपर्छ,” भन्दै व्यवहारिक कार्यान्वयनमा जोड दिनुभयो ।

त्यसैगरी, सोलुदुधकुण्ड नगरपालिका वडा नं. ६ का अध्यक्ष तथा प्रवक्ता फूर्वा ग्याल्जेन शेर्पाले समस्याहरूको सम्बोधनका लागि स्थानीय सरकार सधैं सहयोग गर्न तयार रहेको भन्दै कार्यालय प्रतिनिधिहरूलाई अझ सक्रिय भूमिका खेल्न आग्रह गर्नुभयो । स्वास्थ्य क्षेत्रमा सार्वजनिक सहभागिता र उत्तरदायित्व सुनिश्चित गर्ने उद्देश्यले गरिएको सामाजिक परीक्षणले सेवा सुधारतर्फ सकारात्मक संकेत दिएको सहभागीहरूले बताएका छन् ।