सोलुखुम्बुमा २० आयोजनाका लागि २४ करोड ७७ लाख बजेट विनियोजन

जेठ १९, सोलुखुम्बु । आगामी आर्थिक वर्ष २०८२/८३ का लागि सोलुखुम्बुमा रहेका विभिन्न २० विकास आयोजनाका लागि कुल २४ करोड ७७ लाख रुपैयाँ बजेट विनियोजन गरिएको छ । राष्ट्रिय योजनाबाट विनियोजन भएको उक्त बजेटमध्ये समपूरक अनुदानतर्फ १२ करोड ४५ लाख र विशेष अनुदानतर्फ १२ करोड ३२ लाख रुपैयाँ रहेको छ ।

समपूरक अनुदान अन्तरगत खुम्बु पासाङल्हामु गाउँपालिकाको ङिम दोर्जी सडक ट्रयाक ओपनका लागि २ करोड २० लाख, महाकुलुङ गाउँपालिकाको बुदुम खोला प्रिस्ट्रेस्ड मोटरेबल पुल निर्माणका लागि ९० लाख, सोताङ गाउँपालिका–३ मा खेलमैदान निर्माणका लागि १ करोड ५० लाख रुपैयाँ विनियोजन गरिएको छ । त्यस्तै, सोताङकै दिप्लिघाट बजार, बरबोट आधारभूत विद्यालय, पाँचकन्या कालिका मन्दिर, खहरे आ.वि., वडा नं. ३ कार्यालय हुँदै गाउँपालिका केन्द्रसम्मको सडक स्तरउन्नति तथा कालोपत्रे गर्न १ करोड ६ लाख विनियोजन गरिएको छ ।

त्यस्तै माप्य दुधकोशी गाउँपालिकाको लामाबगर मोटरेबल पुल निर्माणका लागि १ करोड ३८ लाख, थुलुङ दुधकोशी गाउँपालिकाको पंचन–सेसेल्मु–सिरुवानी सडक ट्रयाक ओपनका लागि ५२ लाख र नेचासल्यान गाउँपालिकाको गौरीटाप पर्यटक पार्क निर्माणका लागि १ करोड २२ लाख बजेट छुट्याइएको छ । विशेष अनुदानअन्तर्गत सोलुदुधकुण्ड नगरपालिकाको नुनथला बजार व्यवस्थापनका लागि १ करोड ४ लाख, लिखुपिके गाउँपालिकाको लिखु खोला देखि लाम माने सडक स्तरउन्नति कार्यका लागि १ करोड ८० लाख र पिके टुरिजम एरिया आयोजना निर्माणका लागि ८३ लाख रुपैयाँ विनियोजन गरिएको छ । शिक्षा र स्वास्थ्य क्षेत्रमा पनि उल्लेखनीय बजेट विनियोजन गरिएको छ ।

खुम्बु पासाङल्हामु गाउँपालिकाको हिमालयन आधारभूत विद्यालय, नाम्चेमा छात्रावास निर्माणका लागि ६९ लाख, महाकुलुङ गाउँपालिकाको प्राथमिक अस्पतालमा सिईओएनसी कार्यक्रम सञ्चालनका लागि ७५ लाख तथा अस्पताल सञ्चालन व्यवस्थापनका लागि ६९ लाख विनियोजन गरिएको छ ।

सोताङ प्राथमिक अस्पतालका लागि उपकरण खरिद र व्यवस्थापनमा १ करोड ६५ लाख, थुलुङ दुधकोशी अस्पताल सुदृढीकरणका लागि १ करोड ६५ लाख, र माप्यदुधकोशीको रेप्पदु खानेपानी आयोजनामा बजेट विनियोजन गरिएको छ । नेचासल्यान गाउँपालिकामा कृषि विकास तथा व्यवसाय प्रवद्र्धन कार्यक्रमका लागि २ करोड २५ लाख र शैक्षिक विकास तथा साक्षरतामा सुधारका लागि १ करोड ६५ लाख विनियोजन गरिएको छ ।

सोलुदुधकुण्ड नगरपालिकास्थित सोलुखुम्बु बहुमुखी क्याम्पसमा आइसिटी, ई–लाइब्रेरी, फर्निचर तथा घेराबार व्यवस्थापनका लागि पनि १ करोड ६५ लाख बजेट छुट्याइएको छ । त्यस्तै, लिखुपिके गाउँपालिकामा रहेका विपन्न तथा सिमान्तकृत थामी समुदायका लागि नमुना आवास निर्माणका लागि ६५ लाख रुपैयाँ विनियोजन गरिएको छ । उक्त बजेटले जिल्लाका पूर्वाधार, शिक्षा, स्वास्थ्य, पर्यटन तथा कृषि क्षेत्रमा उल्लेखनीय सुधार ल्याउने विश्वास गरिएको छ ।