खरिखोलामा २२ महिलाले लिए अचार बनाउने तालिम, आत्मनिर्भर बन्ने दिशामा अघि बढ्दै

जेठ १९, सोलुखुम्बु । सोलुखुम्बुको खुम्बु पासाङल्हामु गाउँपालिका–१ खरिखोलामा अचार बनाउने सात दिने तालिम सम्पन्न भएको छ । वडा कार्यालयको समन्वय र घरेलु तथा साना उद्योग कार्यालय, सोलुखुम्बुको आयोजनामा गरिएको तालिममा २२ जना स्थानीय महिलाहरूले सक्रिय सहभागिता जनाएका छन् ।

सोमबार सम्पन्न तालिमको उद्घाटन वडा अध्यक्ष फुनुरु शेर्पाको अध्यक्षता र घरेलु तथा साना उद्योग कार्यालय, सोलुखुम्बुका प्रमुख नारायण प्रसाद खतिवडाको प्रमुख आतिथ्यतामा भएको थियो । तालिम संयोजक टेक बहादुर बस्नेतका अनुसार तालिम महिलाहरूलाई आत्मनिर्भर बनाउने उद्देश्यले आयोजना गरिएको हो ।

तालिममा सहभागी महिलाहरूलाई स्थानीय रूपमा सहजै पाइने मुला, आलु, काउली, गाजर, लसुन, अदुवा तथा मासु प्रयोग गरेर विभिन्न स्वादका अचार बनाउने तरिका सिकाइएको थियो । तालिम समापन कार्यक्रममा अध्यक्ष शेर्पाले महिलाहरूले स्थानीय स्रोत र सीपको भरमा आत्मनिर्भर बन्न सक्ने भन्दै यस्तो किसिमका तालिमले महिलामा आत्मविश्वास बढाउनुका साथै आय आर्जनको स्रोत पनि बन्ने विश्वास व्यक्त गर्नुभयो ।

आयोजकका अनुसार तालिमबाट उत्पादित अचारलाई स्थानीय बजारमा मात्र होइन, बाह्य बजारमा समेत प्रवर्धन गर्ने योजना रहेको छ । यसले महिलाहरूको जीवनस्तर उकास्न सहयोग पुग्ने अपेक्षा गरिएको छ ।