सोलुमा सकियो वडा अध्यक्षलाई समावेशी योजना तर्जुमा सम्बन्धी दुई दिने तालिम

जेठ १९, सोलुखुम्बु । सोलुखुम्बुका वडा अध्यक्षहरूलाई लक्षित गरी समावेशी र सहभागीता मुलक योजना तर्जुमा सम्बन्धी दुई दिने तालिम सम्पन्न भएको छ । प्रदेश अनुसन्धान तथा प्रशिक्षण प्रतिष्ठान, झापाको आयोजनामा तालिम आइतबारदेखि सुरु भई सोमबार सम्पन्न भएको हो ।

तालिममा खुम्बु पासाङल्हामु गाउँपालिका र लिखुपिके गाउँपालिका बाहेकका स्थानीय तहका ३० जना वडा अध्यक्षहरूको सक्रिय सहभागिता रहेको प्रदेश तथा स्थानीय सरकार सवलिकरण कार्यक्रमका संयोजक जनार्दन कटेलले जानकारी दिनुभयो । तालिममा विकास योजनामा समावेशीता र सहभागीता, संघीय संरचनामा स्थानीय तहको योजना तर्जुमा प्रक्रिया, स्थानीय तहको अधिकार तथा कार्यक्षेत्र, र वडा समितिको भूमिकाजस्ता विविध विषयमा जानकारी दिइएको थियो ।

साथै, योजना छनोट, प्राथमिकता निर्धारण, बजेट तथा कार्यक्रम तर्जुमा, सुशासन, सामाजिक उत्तरदायित्व, लैङ्गिक समानता र समावेशीकरणका साथै योजना कार्यान्वयनको अनुगमन, मूल्याङ्कन र भुक्तानी प्रक्रिया विषयमा समेत विस्तृत छलफल गरिएको थियो । तालिमको सहजीकरण विजया राजवैद्य र सिर्जना शाक्यले गर्नुभएको हो ।

सहभागी वडा अध्यक्षहरूले तालिमलाई अत्यन्त उपयोगी र प्रभावकारी भएको प्रतिक्रिया दिएका छन् । आयोजक संस्थाका अनुसार तालिमले स्थानीय तहमा योजनाको तर्जुमा र कार्यान्वयन प्रक्रियामा थप स्पष्टता र प्रभावकारिता ल्याउने अपेक्षा गरिएको छ ।