सल्लेरीमा बजारअनुगमन : म्याद नाघेका सामग्री जफत

जेठ १९, सोलुखुम्बु । सोलुखुम्बुको सदरमुकाम सल्लेरीमा सोमबार गरिएको बजार अनुगमनले उपभोक्ता सुरक्षाप्रति गम्भीर लापरबाही उजागर गरेको छ । जिल्ला प्रशासन कार्यालय, सोलुदुधकुण्ड नगरपालिका, घरेलु तथा साना उद्योग कार्यालय तथा उद्योग वाणिज्य सङ्घको संयुक्त टोलीले गरेको अनुगमनमा उपभोग गर्न नहुने म्याद नाघेका सामग्री थुप्रै पसलमा फेला परेका छन् ।

अनुगमन टोलीका अनुसार सहायक प्रमुख जिल्ला अधिकारी नरेन्द्र कुमार श्रेष्ठको नेतृत्वमा भएको सो अभियानमा २२ वटा पसल निरीक्षण गरिएका थिए । अनुगमनको क्रममा फलफूल, बिस्कुट, शीतल पेय पदार्थ (कोक, फेन्टा), चामल तथा कस्मेटिक सामग्रीजस्ता दैनिक उपभोग्य वस्तुहरू म्याद नाघेको अवस्थामा फेला परेका छन् ।

ती सामग्रीको अनुमानित मूल्य २५हजार ६ सय ८० बराबरको रहेको बताइएको छ । त्यस्तै, अधिकांश पसलमा उपभोक्ताले सहज रूपमा मूल्य बुझ्न सक्ने मूल्य सूची राखिएको नपाइएपछि व्यवसायीलाई तुरुन्तै सूची राख्न निर्देशन दिइएको छ । साथै, दर्ता नगरी सञ्चालनमा रहेका पसलहरूलाई व्यवसाय दर्ता गर्न पनि आग्रह गरिएको छ ।

प्रशासनले बजारमा पाइने वस्तुको गुणस्तर र मूल्य पारदर्शिता कायम गर्न यस्ता अनुगमनलाई निरन्तरता दिने जनाएको छ । स्थानीय उपभोक्ताको स्वास्थ्य र हकको रक्षा गर्न निगरानी थप कडा बनाइने बताइएको छ ।

यस किसिमको संयुक्त अनुगमन उपभोक्ता हितका लागि सकारात्मक कदम मानिँदैछ भने व्यवसायीहरूलाई पनि कानुनी दायरामा रहन चेतावनी दिनुको सट्टा सुधारको अवसरका रूपमा हेरिएको छ ।