सोलुदुधकुण्ड नगरपालिका पूर्ण खोप सुनिश्चितता पालिका घोषणा

जेठ २०, सोलुखुम्बु । सोलुखुम्बुको सोलुदुधकुण्ड नगरपालिका पूर्ण खोप सुनिश्चितता पालिकाका रूपमा घोषणा गरिएको छ । मंगलबार सदरमुकाम सल्लेरीस्थित एक होटलमा आयोजित विशेष समारोहमार्फत यो ऐतिहासिक घोषणा गरिएको हो । ‘स्थानीय स्रोत उपयोग, स्वामित्व र सहभागिता, पूर्ण खोप सुनिश्चितता हाम्रो प्रतिबद्धता’ भन्ने मूल नाराका साथ आयोजित कार्यक्रममा नगरप्रमुख नाम्गेल जाङ्बु शेर्पाको प्रमुख आतिथ्यता रहेको थियो। जनस्वास्थ्य निरीक्षक चमर बहादुर मगरले कार्यक्रममा प्रस्तुत प्रतिवेदनमा १३ सय ९९ जना बालबालिकाले पूर्ण खोप प्राप्त गरिसकेको जानकारी दिनुभयो ।
वडा अनुसार खोप प्राप्त गरेका बालबालिकाको विवरणः
वडा नं. १ टाक्सिन्दुः १०४ जना

वडा नं. २ बेनीः ४६ जना

वडा नं. ३ तामाखानीः ५३ जना

वडा नं. ४ लुराः १३६ जना

वडा नं. ५ सल्लेरीः १४३ जना

वडा नं. ६ खोरियाः १०६ जना

वडा नं. ७ गार्माः ११९ जना

वडा नं. ८ केरुङः २०४ जना

वडा नं. ९ गोराखानीः ५८ जना

वडा नं. १० टाप्टिङः २२६ जना

वडा नं. ११ तिङ्लाः २२६ जना

जन्मेदेखि १५ महिनासम्मका २७२ जना र १६ महिना देखि ५९ महिनासम्मका ११२७ जना गरी कुल १३९९ जना बालबालिकाले पूर्ण खोप प्राप्त गरेका छन् । नगरपालिकाले यस अभियानमार्फत खोपबाट बच्न सकिने रोगको संक्रमण दर, अपाङ्गता दर र बालमृत्युदरमा कमी ल्याउने, सबै बालबालिकालाई राष्ट्रिय खोप तालिका अनुसारको खोप उपलब्ध गराउने र स्थानीय तहबाट खोप सुनिश्चितताको प्रमाणीकरण गर्ने लक्ष्य राखेको थियो ।

नगरप्रमुख शेर्पाले घोषणा मात्र गरेर नहुने, यसलाई दीगो बनाउँदै कार्यान्वयनमा निरन्तरता दिनु आवश्यक रहेकोमा जोड दिनुभयो । साथै, स्वयंसेविकाहरूको गुनासोलाई सम्बोधन गर्दै आगामी दिनमा स्वास्थ्यकर्मी र स्वयंसेविकाबीच अझ सहकार्य हुने प्रतिबद्धता व्यक्त गर्नुभयो ।

कार्यक्रममा प्रमुख प्रशासकीय अधिकृत टुक्ति शेर्पा, नगर प्रवक्ता फुर्वा ग्याल्जेन शेर्पा, वडाध्यक्षहरू, स्वास्थ्य संस्थाका प्रमुख तथा प्रतिनिधिहरूको उपस्थिति थियो। सफल खोप अभियानमा समर्पित स्वास्थ्यकर्मी, स्वयंसेविका तथा सहयोगी संस्थाहरूलाई सम्मान पनि प्रदान गरिएको थियो ।