हलेसीमा महिला, अपाङ्गता भएका र विदेशबाट फर्किएकालाई बङ्गुरका पाठा वितरण

जेठ २०, सोलुखुम्बु । खोटाङको हलेसी तुवाचुङ नगरपालिकाले महिला, अपाङ्गता भएका र विदेशबाट फर्किएकालाई बङ्गुरका पाठा वितरण गरेको छ । “बङ्गुर प्रवर्धन कार्यक्रम” अन्तर्गत महिला, अपाङ्गता भएका तथा वैदेशिक रोजगारीबाट फर्किएका नागरिकलाई आर्थिक रूपमा सशक्त बनाउने उद्देश्यले उन्नत जातका बङ्गुरको पाठापाठी वितरण गरेको हो ।

नगरपालिकाले सूचीकृत ११५ वटा बङ्गुरको पाठापाठी लाभग्राहीलाई वितरण गरेको जनाइएको छ । नगर प्रवक्ता कमल गिरीका अनुसार, मासु उत्पादनमा आत्मनिर्भरता बढाउने लक्ष्यसहित १६ घरपरिवारलाई खोर निर्माणमा लागतको ६० प्रतिशत बराबरको अनुदान दिइएको छ । दुई लाख रुपैयाँ लागत पर्ने खोरमा नगरपालिकाले एक लाख २० हजार रुपैयाँ अनुदान दिएको हो। यी परिवारहरूलाई दुई/दुई वटा उन्नत जातका बङ्गुर पनि प्रदान गरिएको छ ।

खोर निर्माणमा अनुदान प्राप्त गरेका लाभग्राही मात्र नभई, छनोट समितिको सिफारिसमा ६८ घरपरिवारलाई एक/एक वटा बङ्गुर पनि वितरण गरिएको गिरीले जानकारी दिनुभयो । साथै, करुणा फाउन्डेसनको सहयोगमा अपाङ्गता भएका १५ घरपरिवारलाई समेत उन्नत जातका बङ्गुरका पाठापाठी वितरण गरिएको छ । नगरपालिकाले पशुपालनसँगै कृषि र साना उद्यममा रुचि भएका नागरिकलाई निरन्तर अनुदान र प्राविधिक सहयोग दिँदै आएको छ।

यसअघि नगरपालिका मार्फत १०० वटा उन्नत जातका भैँसी समेत वितरण भइसकेको छ । सुक्खाग्रस्त क्षेत्र मानिने हलेसी तुवाचुङ नगरपालिकाले स्थानीय उत्पादनमा वृद्धि गरी दूध, मासु र तरकारीमा आत्मनिर्भरता हासिल गर्ने दीर्घकालीन योजना अघि सारेको छ । आर्थिक वर्ष २०८०/८१ को नगरसभा मार्फत नीति तथा कार्यक्रम पारित गरी कार्यान्वयनमा लागिएको हो ।