ताप्ली गाउँपालिका–१ ओख्ले बालमैत्री वडा घोषणा

जेठ २०, सोलुखुम्बु । “उज्यालो ताप्ली, दिगो विकास र बालमैत्री सहितको पूर्वाधार शिक्षा, स्वास्थ्य, कृषि, पर्यटन र रोजगार, हरियाली ताप्लीको समृद्धिको आधार” भन्ने मूल नाराका साथ ताप्ली गाउँपालिका–१, ओख्लेलाई बालमैत्री वडा घोषणा गरिएको छ । ५१ वटा बालमैत्री सूचकहरू पूरा गरेपछि औपचारिक कार्यक्रमका बीच यो घोषणा गरिएको हो । कार्यक्रममा ताप्ली गाउँपालिकाका अध्यक्ष ढुङ्गराज बिश्वकर्मा प्रमुख अतिथि हुनुहुन्थ्यो भने उपाध्यक्ष धनामाया मगर, प्रमुख प्रशासनिक अधिकृत मनोज कुमार मगर, पाँचै वडाका वडाध्यक्षहरू, जाल्पा एकीकृत विकास समाजका अध्यक्ष पुष्पराज पोखरेल, मानव अधिकार तथा वातावरण विकास केन्द्र (हुरेण्डेक) का अध्यक्ष शंकर बहादुर थापा र वल्र्ड भिजन इन्टरनेशनल नेपालका कार्यक्रम प्रमुख आनन्द खड्का विशेष आतिथ्यता रहेको थियो ।

बालमैत्री वडा घोषणामा विशेष भूमिका निर्वाह गर्ने संस्थाहरूमा वल्र्ड भिजन इन्टरनेशनल नेपाल, जाल्पा एकीकृत विकास समाज र हुरेण्डेक उदयपुर रहेका छन् । ती संस्थाहरूले विगत केही वर्षदेखि शिक्षा, स्वास्थ्य, बाल स्पोन्सरसिप, जीविकोपार्जन लगायतका क्षेत्रमा काम गर्दै आएका छन् । ताप्ली–१ ओख्ले गाउँपालिकाको तेस्रो बालमैत्री वडा बनेको हो । यस उपलब्धिमा वडाका स्वास्थ्यकर्मी, महिला स्वास्थ्य स्वयंसेविका, बाल क्लब, युवा क्लब, विद्यालय, जनप्रतिनिधि तथा कर्मचारीहरूको महत्वपूर्ण योगदान रहेको कार्यक्रमका वक्ताहरूले बताएका छन् । कार्यक्रममा हुरेण्डेक अध्यक्ष शंकर बहादुर थापाले ५१ वटा सूचकहरू पुरा गर्न समन्वयात्मक रूपमा काम गरिएको उल्लेख गर्दै अब पोषणमैत्री वडा तथा स्थानीय तह घोषणा गर्न चरणबद्ध रूपमा अघि बढ्नुपर्नेमा जोड दिनुभयो ।

गाउँपालिका उपाध्यक्ष धनामाया मगरले बालबालिकाको समग्र विकासका लागि बजेटमा कुनै कञ्जुस्याइँ नगरेको र आगामी दिनमा पनि निरन्तरता दिने प्रतिबद्धता जनाउनुभयो । समापन सत्रमा बोल्दै गाउँपालिका अध्यक्ष ढुङ्गराज बिश्वकर्माले बालमैत्री वडा घोषणाका लागि सबै साझेदार संस्था, पालिका, वडा तथा विषयगत शाखाका कर्मचारी र जनप्रतिनिधिहरूको योगदानको सराहना गर्दै धन्यवाद ज्ञापन गर्नुभयो । कार्यक्रममा विशिष्ट अतिथिहरू, संस्था प्रतिनिधि, स्वयंसेविका, विद्यालय प्रमुख तथा टोल विकास संस्थाका प्रतिनिधिलाई प्रशंसापत्र, कदरपत्र तथा मायाको चिनो प्रदान गरिएको थियो।

वडा कार्यालयको प्राङ्गणमा आयोजित कार्यक्रम वडा अध्यक्ष उद्धव हमालको सभापतित्वमा सम्पन्न भएको हो । सहकर्मी ठबिन्द्र मगरका अनुसार यो कार्यक्रम ताप्ली–१ ओख्ले वडा कार्यालयको आयोजनामा वल्र्ड भिजन ईन्टरनेशनल नेपाल, जाल्पा एकीकृत विकास समाज र हुरेण्डेकको सहयोगमा सम्पन्न भएको हो ।