रीड नेपालको आयोजनामा सोलुमा शिक्षकको पेसागत विकासका लागि (टिपिटी) एक महिने प्रमाणीकरण तालिम

जेठ २१, सोलुखुम्बु । सोलुखुम्बुमा शिक्षकहरूको पेसागत विकासका लागि रीड नेपाल सोलुखुम्बुको आयोजना तथा शिक्षा तालिम केन्द्र, सुनसरी र शिक्षा विकास तथा समन्वय इकाइको सहकार्यमा (टिपिटी) एक महिने प्रमाणीकरण तालिम प्रदान गरिएको छ । तालिम जिल्लाका स्थानीय तहहरूसँगको समन्वयमा जेठ ७ गतेबाट सुरु भई जन जागृति माध्यमिक विद्यालयमा प्रदान गरिएको हो ।

अष्ट्रेलियन एआईडी र अष्ट्रेलियन हिमालयन फाउण्डेशनको आर्थिक सहयोगमा सञ्चालित उक्त तालिमको उद्देश्य विद्यालयस्तरका शिक्षकहरूलाई पेशागत सीपमा दक्ष बनाउने रहेको छ । तालिमको समापन समारोह संयोजक केशव देव गिरीको अध्यक्षता र सोलुदुधकुण्ड नगरपालिकाकी उपप्रमुख गान्धि माया तामाङको प्रमुख आतिथ्यतामा सम्पन्न भएको हो । समापन समारोहमा बोल्दै संयोजक गिरीले तालिम शिक्षकहरूका लागि अत्यन्तै उपयोगी भएको उल्लेख गर्दै सिकेका सीपहरू विद्यालयमा व्यवहारमा उतार्न आग्रह गर्नुभयो ।

उपप्रमुख तामाङले शिक्षकहरूको क्षमतावृद्धि बिना गुणस्तरीय शिक्षा सम्भव नहुने बताउँदै यस्ता तालिमहरूमा नगरपालिकाको निरन्तर सहयोग रहने प्रतिबद्धता व्यक्त गर्नुभयो । विगतका वर्षहरुमा सो तालिम लिन सुनसरीको इटहरी जानु पर्ने बाध्यता भएको भए पनि यस वर्ष जिल्लामा नै तालिम लिन पाइएको भन्दै सहभागीहरुले खुसी व्यक्त गरेका छन् ।

तालिममा ३७ जना शिक्षकहरूको सक्रिय सहभागिता रहेको थियो भने सहभागीहरूले तालिम अत्यन्तै प्रभावकारी र व्यवहारिक भएको प्रतिक्रिया दिएका छन् । रीड नेपालले आगामी दिनहरूमा पनि यस्ता कार्यक्रमलाई निरन्तरता दिने प्रतिबद्धता जनाएको छ ।