सोलुखुम्बुका खेलाडी राष्ट्रपति रनिङ शिल्डबाट बाहिर, बजेट अभावले सहभागी हुन नसक्ने

जेठ २१, सोलुखुम्बु । सोलुखुम्बुबाट यस वर्षको १५औँ राष्ट्रपति रनिङ शिल्ड प्रतियोगितामा कुनै पनि खेलाडी सहभागी नहुने भएको छ । जिल्लाका आठवटै स्थानीय तहबाट खेलाडी छनौट गरिसकिए पनि प्राविधिक र बजेटसम्बन्धी समस्याका कारण खेलाडी प्रदेशस्तरीय प्रतियोगितामा पठाउन नसकिएको हो ।

सोलुखुम्बु जिल्ला खेलकुद विकास समितिका कार्यालय प्रमुख नेत्र प्रसाद घिमिरेले जिल्लास्तरीय छनौट प्रतियोगिता बजेट अभावकै कारण सम्पन्न हुन नसक्दा प्रदेशस्तरीय सहभागिता सम्भव नभएको बताउनुभयो । प्रदेश खेलकुद विकास बोर्डले प्रदेशस्तरीय प्रतियोगिता जेठ २४ र २५ गते आयोजना गर्ने जानकारी गराउँदै खेलाडीहरूलाई जेठ २३ गतेभित्र पठाउन निर्देशन दिएको थियो । तर, आवश्यक बजेट प्रदेश सरकारबाट नआएको र जिल्ला स्तरमा पनि स्रोत व्यवस्थापन हुन नसकेकाले अन्ततः प्रतियोगितामा सहभागी हुन नसकेको घिमिरेले बताउनुभयो ।

उहाँका अनुसार अन्य केही जिल्लाले भने आफ्नै स्रोतबाट बजेट जुटाएर खेलाडीहरू पठाउन सफल भएका छन् । यता प्रदेश खेलकुद विकास बोर्डले केन्द्र सरकारबाट नै बजेट नआएकाले जिल्लामा रकम पठाउन नसकेको स्पष्ट पारेको छ । स्थानीय युवा तथा खेलकर्मीहरूले स्थायी संरचना, समयमै तयारी र बजेट व्यवस्थापनमा सुधार गर्न माग गरेका छन् ।