सोलुखुम्बुको गार्मा पहिलो बालमैत्री स्थानीय शासनयुक्त वडा घोषणा हुँदै

जेठ २३, सोलुखुम्बु । सोलुखुम्बुको सोलुदुधकुण्ड नगरपालिका–७, गार्मा आगामी जेठ २९ गते जिल्लाकै पहिलो बालमैत्री स्थानीय शासनयुक्त वडा घोषित गरिने भएको छ । बालबालिकासम्बन्धी सबै सुचाङ्कहरू पूरा गरेको आधारमा वडालाई बालमैत्री बनाउने तयारी अन्तिम चरणमा पुगेको सोलुदुधकुण्ड नगरपालिका वडा नम्बर ७ का वडा अध्यक्ष सोनाम ग्याल्जेन शेर्पाले जानकारी दिनुभयो ।

‘बालबालिकामा लगानी सबैको सरोकार, बालमैत्री शासन विकास र समृद्धिको आधार’ भन्ने नारासहित गार्मा माध्यमिक विद्यालयको प्राङ्गणमा कार्यक्रम आयोजना गरिने भएको छ । सो कार्यक्रममा प्रमुख अतिथिका रूपमा जिल्ला समन्वय समितिका प्रमुख कृष्ण प्रसाद निरौला र विशिष्ट अतिथिका रूपमा सोलुदुधकुण्ड नगरप्रमुख नाम्गेल जाङ्बु शेर्पाको उपस्थिति रहनेछ । कार्यक्रमको सभापतित्व वडाध्यक्ष सोनाम ग्याल्जेन शेर्पाले गर्नेछन् ।

वडाले बालबालिकाको समग्र विकास, सुरक्षा, शिक्षा, स्वास्थ्य र सशक्तीकरणमा निरन्तर ध्यान दिँदै आएको छ । शिक्षा, स्वास्थ्य, सुरक्षा, सहभागिता र समावेशिता जस्ता पक्षमा वडाको सक्रियताले अन्य वडाहरूलाई समेत प्रेरणा दिने अपेक्षा गरिएको छ ।