टाप्टिङमा सुरु भयो सात दिने उद्यमशिलता विकास तालिम

जेठ २३, सोलुखुम्बु । सोलुखुम्बुको सोलुदुधकुण्ड नगरपालिका–१० टाप्टिङमा सात दिने उद्यमशिलता विकास तालिम सुरु भएको छ । वडा कार्यालयको समन्वय तथा घरेलु तथा साना उद्योग कार्यालय, सोलुखुम्बुको आयोजनामा शुक्रबारबाट तालिम सुरु गरिएको हो । कार्यक्रम कार्यवाहक वडा अध्यक्ष लाक्पा शेर्पाको अध्यक्षता र घरेलु तथा साना उद्योग कार्यालय सोलुखुम्बुका प्रमुख नारायण प्रसाद खतिवडाको प्रमुख आतिथ्यतामा उद्घाटन गरिएको हो ।

तालिम संयोजक टेक बहादुर बस्नेतका अनुसार तालिममा २० जना सहभागी रहेका छन् । सहभागीहरूलाई तालिम प्रशिक्षक खेम माया विश्वकर्माले सहजीकरण गरिरहनुभएको छ । कार्यक्रममा बोल्दै प्रमुख अतिथि नारायण प्रसाद खतिवडाले युवाहरुलाई स्वरोजगारतर्फ उन्मुख गराउन यस्ता तालिमहरू प्रभावकारी हुने विश्वास व्यक्त गर्नुभयो । उहाँले सरकारी कार्यक्रम तथा स्रोतहरू स्थानीय तहमा उपयोग गरेर युवाहरूले सिपको माध्यमबाट आत्मनिर्भर बन्न सक्ने बताउनुभयो ।

त्यसैगरी, कार्यवाहक अध्यक्ष तेन्जि शेर्पाले वडा कार्यालय सदैव यस्ता सीपमूलक तालिमहरूमा सहकार्य गर्न तयार रहेको बताउँदै तालिमबाट सिकेका सीपलाई व्यवहारमा उतार्न सहभागीहरूलाई आग्रह गर्नुभयो । “सिप र ज्ञानलाई व्यवसायमा रुपान्तरण गर्दै आर्थिक सशक्तिकरणतर्फ लाग्न सके स्थानीय समृद्धिको बाटो सहज बन्छ,” उहाँले भन्नुभयो । सात दिने तालिमबाट सहभागीहरूले साना तथा घरेलु उद्योग सञ्चालनका विविध पक्षबारे ज्ञान लिनेछन् । आयोजकले तालिम सफलतापूर्वक सम्पन्न गर्न सबै पक्षको सहयोग अपेक्षा गरेको छ ।