महाकुलुङले पायो करोडौंको संघीय अनुदान, अस्पताल र पुल निर्माणमा बजेट विनियोजन

जेठ २३, सोलुखुम्बु । महाकुलुङ गाउँपालिकाले आगामी आर्थिक वर्ष २०८२/८३ का लागि संघीय समपूरक तथा विशेष अनुदान शीर्षकमा करोडौं रुपैयाँ बराबरको बजेट प्राप्त गरेको छ । गाउँपालिका अध्यक्ष सूर्य बहादुर कुलुङका अनुसार संघीय समपूरक अनुदान अन्तर्गत बुदुम खोला प्रिस्ट्रेस मोटरेबल पुल निर्माणका लागि ९० लाख रुपैयाँ विनियोजन गरिएको छ । त्यसैगरी, विशेष अनुदान अन्तर्गत महाकुलुङ आधारभूत अस्पताल व्यवस्थापन तथा निर्माणका लागि चालुतर्फ ७५ लाख र पूँजीगत तर्फ ६९ लाख गरी कुल १ करोड ४४ लाख रुपैयाँ बजेट प्राप्त भएको छ ।

अघिल्लो वर्ष विशेष अनुदान अन्तर्गत ५० लाख रुपैयाँ मात्र प्राप्त भएको थियो ।, अध्यक्ष कुलुङका अनुसार यो संघीय समपूरक अनुदान गाउँपालिकाले पहिलोपटक प्राप्त गरेको हो भने विशेष अनुदान दोस्रोपटक प्राप्त भएको हो । “राष्ट्रिय योजना आयोगको अनलाइन प्रणालीमा योजनाहरू प्रविष्ट गरेपछि मात्र यी अनुदानहरू प्राप्त हुने प्रक्रिया हुन्छ,“ कुलुङले बताउनुभयो । यस कार्यमा सहयोग पुर्याउने कर्मचारीहरूलाई धन्यवाद व्यक्त गर्दै उहाँले समयमै योजना प्रविष्टि गर्नुको महत्त्व पनि औंल्याउनुभयो । अर्थ मन्त्रालयले विशेष अनुदान सम्बन्धी कार्यविधि, २०८१ र समपूरक अनुदान कार्यविधि, २०८१ तर्जुमा गरी लागू गरेपछि राष्ट्रिय योजना आयोगमार्फत सूचना प्रकाशन गरी प्रस्ताव मागिएको थियो ।

यसैबीच, महाकुलुङ गाउँपालिकाको प्रशासनिक भवन निर्माणका लागि स्थानीय पूर्वाधार विभाग (डोली) बाट लागत साझेदारीमा परियोजना स्वीकृत भएको अध्यक्ष कुलुङले जानकारी दिनुभयो। उहाँका अनुसार उक्त परियोजनामा गाउँपालिकाको ४० प्रतिशत र विभागको ६० प्रतिशत लागत साझेदारी रहनेछ। चालु आर्थिक वर्षभित्रै करिब १ करोड रुपैयाँ बजेट प्राप्त हुने गरी प्रक्रिया अगाडि बढाइएको उहाँले बताउनुभयो । अध्यक्ष कुलुङले परियोजना स्वीकृत गराउन महत्त्वपूर्ण भूमिका निर्वाह गर्नुभएका उप–प्रधान तथा सहरी विकास मन्त्री माननीय प्रकाशमान सिंहप्रति आभार व्यक्त गर्नुभयो ।