खानेपानी मुहान सरसफाई तथा जाँच गर्ने सोलुदुधकुण्ड नगरपालिकाको निर्णय

जेठ २४, सोलुखुम्बु । सोलुखुम्बुको सोलुदुधकुण्ड नगरपालिकाले नगर क्षेत्रभित्रका खानेपानी मुहानहरूको सरसफाई तथा पानीको गुणस्तर परीक्षण गर्ने निर्णय गरेको छ। शनिबार सम्पन्न ‘संक्रामक महामारी तथा पानीजन्य रोग र खानेपानी गुणस्तर जाँच’ सम्बन्धी अन्तरक्रिया कार्यक्रममा उक्त निर्णय गरिएको हो । कार्यक्रममा नगरभित्र क्रियाशील खानेपानी उपभोक्ता समितिका अध्यक्ष तथा पदाधिकारीहरूसँग अन्तरक्रिया गरिएको जनस्वास्थ्य निरीक्षक सुवास तामाङले जानकारी दिनुभयो ।

उहाँका अनुसार अन्तरक्रिया कार्यक्रममा प्रत्येक उपभोक्ता समितिलाई आफ्नो क्षेत्रमा पर्ने खानेपानीको मुहान सरसफाईमा विशेष ध्यान दिन तथा मुहानको नमुना (एक–एक बोतल पानी) परीक्षणका लागि काठमाडौं पठाउने निर्णय गरिएको छ । जनस्वास्थ्य निरीक्षक तामाङले पानीजन्य रोगहरू रोक्नको लागि खानेपानीको स्रोत सफा हुनुका साथै गुणस्तरीय हुनु अत्यावश्यक रहेकोमा जोड दिनुभयो ।

कार्यक्रमको अध्यक्षता सोलुदुधकुण्ड नगरपालिकाकी उपमेयर गान्धि माया तामाङले गर्नुभएको थियो । उपमेयर तामाङले सरसफाइ तथा पानी परीक्षण नगरको सार्वजनिक स्वास्थ्यसँग प्रत्यक्ष जोडिएको विषय भएकाले सबै उपभोक्ता समितिहरू सक्रियतापूर्वक अघि सर्नु आवश्यक रहेको बताउनुभयो ।

कार्यक्रममा नगर प्रवक्ता फुर्वा ग्याल्जेन शेर्पा, जनस्वास्थ्य निरीक्षक चमर बहादुर मगर, नगर प्रहरी तथा खानेपानी उपभोक्ता समितिका प्रतिनिधिहरूको उपस्थिति रहेको थियो । नगरपालिकाले लिएको यो निर्णय स्थानीय स्तरमा खानेपानी सुरक्षामा एक महत्वपूर्ण कदमको रूपमा हेरिएको छ ।