स्थानीय उत्पादन बजारीकरणमा भूमिका खेलेका थुलुङ दुधकोशी गाउँपालिका अध्यक्ष राई सम्मानित

जेठ २४, सोलुखुम्बु । सोलुखुम्बुको थुलुङ दुधकोशी गाउँपालिकाका अध्यक्ष असिम राईलाई स्थानीय उत्पादनको बजारीकरणमा खेलेको सक्रिय भूमिकाका लागि विशेष सम्मान गरिएको छ । रैथाने कृषि उपज तथा वस्तुहरूको प्रवद्र्धन र संरक्षणका लागि सञ्चालन हुँदै आएको ‘रैथाने हाटबजार’ १०० औं हप्ता पुगेको अवसरमा आयोजित कार्यक्रममा कृषि तथा पशुपन्छी विकास मन्त्री रामनाथ अधिकारीले अध्यक्ष राईलाई सम्मानित गरेका हुन् । काठमाडौँको दरबारमार्गस्थित ओरियण्ट क्याफेमा शनिबार सम्पन्न सो कार्यक्रममा रैथाने एग्री प्रडक्टस् नेपालले आयोजना गरेको विशेष अन्तरक्रियामा सम्मान प्रदान गरिएको हो ।

कार्यक्रममा आयोजक संस्थाले अध्यक्ष राईले गाउँपालिकाबाट उत्पादित कृषि वस्तुहरूको बजारीकरणमा पु¥याएको योगदानको उच्च मूल्याङ्कन गरिएको जानकारी गराउनुभयो । गाउँपालिकाको ‘कृषि एम्बुलेन्स’ प्रयोग गरी रैथाने हाटबजारसम्म स्थानीय उत्पादन पु¥याउने व्यवस्थामा राईको अग्रसरता रहेको जनाइएको छ । अध्यक्ष राईको अगुवाइमा थुलुङ दुधकोशीमा रैथाने कृषि उत्पादन, परम्परागत सीप तथा प्रविधिको प्रवद्र्धन र संरक्षणका प्रयासले आगामी दिनमा थप प्रभाव पार्ने अपेक्षा गरिएको छ । कार्यक्रम एग्रो प्रडक्टस् नेपालका अध्यक्ष तिलक ढकालको अध्यक्षतामा सम्पन्न भएको हो।

कार्यक्रममा पूर्वमन्त्री तथा सांसद शेरबहादुर तामाङ, कृषि मन्त्रालयका सहसचिव डा. रामकृष्ण श्रेष्ठ, खनियाबास गाउँपालिकाका अध्यक्ष रणबहादुर तामाङ, नेपाल डेरी एसोसिएसनका अध्यक्ष प्रह्लाद दाहाललगायतले सहभागी जनाएका थिए । कृषिमन्त्री अधिकारीले आयातित वस्तुको अत्यधिक उपभोगका कारण स्वास्थ्यमा असर पुगेको भन्दै विषादीरहित परम्परागत बालीको प्रवद्र्धनमा सरकारले आगामी बजेटमार्फत कार्यक्रम अघि बढाएको जानकारी दिनुभयो ।

“अब अत्यावश्यक खाद्य वस्तुको आयात प्रतिस्थापन गरी व्यावसायिक कृषि विकासमा केन्द्रित हुनुपर्ने बेला आएको छ,” मन्त्री अधिकारीको भनाइ थियो । रैथाने उत्पादनप्रतिको जागरणसँगै बजारसम्म पहुँच, उपभोग र व्यवसायीकरणका पक्षमा थुलुङ दुधकोशी गाउँपालिकाको प्रयास उदाहरणीय रहेको सहभागीहरूले बताएका छन् ।