हलेसी तुवाचुङलाई ‘पान उत्कृष्ट नगरपालिका पुरस्कार–२०८२’

जेठ २४, सोलुखुम्बु । कोशी प्रदेश अन्तर्गत खोटाङ जिल्लाको हलेसी तुवाचुङ नगरपालिकाले ८८प्रिन्सिपल्स एसोसिएसन अफ नेपाल (पान) बाट प्रदान गरिने ‘पान उत्कृष्ट नगरपालिका पुरस्कार–२०८२’ प्राप्त गरेको छ । प्रत्येक वर्ष प्रदान गरिने यस पुरस्कारमा यस वर्ष हलेसी तुवाचुङले शिक्षा क्षेत्रमा देखाएको नेतृत्व, प्रतिबद्धता र नवीन पहलका कारण उत्कृष्ट ठहरिँदै सम्मानित भएको हो ।

पानका अध्यक्ष सुदामप्रसाद गौतमका अनुसार, डाक्टर विद्यानाथ कोइरालाको नेतृत्वमा गठित छनोट समितिले २५ वटा शैक्षिक मापदण्डका आधारमा मूल्यांकन गरी नगरपालिकालाई कोशी प्रदेशकै उत्कृष्ट नगरपालिका घोषित गरेको हो । पुरस्कार पानको दोस्रो राष्ट्रिय सम्मेलनको अवसरमा प्रदान गरिएको हो। ‘नेतृत्वका नयाँ परिभाषा : विद्यालय उत्कृष्टताका लागि परिवर्तनको अगुवाइ’ भन्ने नारामा आयोजित सम्मेलनमा शिक्षा, विज्ञान तथा प्रविधिमन्त्री रघुजी पन्तले नगर प्रमुख विमला राईलाई दोसल्ला ओढाएर पुरस्कार हस्तान्तरण गरेका थिए ।

सम्मेलनमा देशभरबाट आएका शिक्षाविद्, नीति निर्माता, प्राध्यापक, शिक्षक, विद्यार्थी तथा अभिभावक गरी एक हजारभन्दा बढीको सहभागिता रहेको थियो। गाउँपालिकातर्फ भने कोशी प्रदेशबाट ईलामको रोङ गाउँपालिका पुरस्कृत भएको छ । नगर प्रमुख विमला राईका अनुसार, पुरस्कार प्राप्त गर्नु नगरपालिकाका लागि ठूलो हौसला र प्रेरणा भएको छ। हलेसी तुवाचुङले विगत केही वर्षयता शिक्षा क्षेत्र सुधारमा निरन्तर प्रयास गर्दै आएको छ ।

हाल नगरपालिकाभित्र ९० वटा विद्यालय सञ्चालनमा छन्। पछिल्ला तीन वर्षमा भौतिक पूर्वाधार विकास, शिक्षक दरबन्दी व्यवस्थापन, प्रविधियुक्त कार्यक्रम सञ्चालन, शिक्षण विधि सुधार, प्रयोगात्मक सिकाइ, पुस्तकालय स्थापना, बालमैत्री संरचना निर्माण, खानेपानी तथा शौचालय व्यवस्थापन, शिक्षक तालिम, नियमित अनुगमन लगायत थुप्रै महत्वपूर्ण कार्यहरू भएका छन् ।

नगरपालिकाले हालसम्म २६ वटा आरसिसी भवन निर्माण गरिसकेको छ भने २८ वटा विद्यालयको भवन मर्मत गरिएको छ। दिवाखाजा, छात्रवृत्ति कार्यक्रमजस्ता शैक्षिक गुणस्तर अभिवृद्धि कार्यक्रमहरू पनि प्रभावकारीरूपमा सञ्चालनमा छन् । महिलाको नेतृत्वमा अघि बढेको हलेसी तुवाचुङ नगरपालिकाले शिक्षाको क्षेत्रमा छोटो समयमै उल्लेखनीय सफलता हासिल गर्दै जिल्लाभर सकारात्मक उदाहरण प्रस्तुत गरेको छ ।