सोलुखुम्बु, खोटाङ र सुनसरीका खेलाडी राष्ट्रपति रनिङ शिल्डबाट बञ्चित

जेठ २४, सोलुखुम्बु । मोरङको विराटनगरमा आजदेखि शुरू भएको १५ औं राष्ट्रपति रनिङ शिल्ड कोशी प्रादेशिक छनोट प्रतियोगितामा सुनसरी, खोटाङ र सोलुखुम्बुका विद्यार्थी छुटेका छन् । कोशी प्रदेश खेलकुद विकास बोर्डको आयोजनामा तथा राष्ट्रिय खेलकुद परिषद् (राखेप) को संयोजनमा शुरू भएको प्रतियोगितामा ३ वटा जिल्लाका ३ सय २४ जना खेलाडी प्रतिस्पर्धा गर्नबाट वञ्चित भएका हुन् ।

३ वटा जिल्लामा समयमै जिल्लास्तरीय छनोट गर्न नसकेकाले सहभागिता जनाउन नसकेको आयोजकले जनाएको छ । पालिकाबाट छनोट भइसके पनि जिल्ला छनोट हुन नसकेको हो । छोटो समय दिएको र तयारी खर्चसमेत नपठाएका कारण जिल्ला छनोट गर्न नसकेको जिल्ला खेलकुद विकास समितिहरूले बताएका छन् । कोशीका ११ वटा जिल्लाले पालिकाहरूसँग समन्वय गरेर छनोट गरे पनि सुनसरी, सोलुखुम्बु र खोटाङले भने गर्न नसकेका हुन् ।

विद्यालय खेलकुदको सबैभन्दा ठूलो उत्सवका रूपमा लिइने राष्ट्रपति रनिङ शिल्डमा एथ्लेटिक्स, भलिबल, कबड्डी, कराँते, तेक्वान्दो र उसु गरी ६ वटा विधामा प्रतिस्पर्धा हुने गरेको छ ।