जेठ २४, सोलुखुम्बु । सोलुखुम्बुको लिखुपिके गाउँपालिकाद्वारा आर्थिक वर्ष २०८२÷८३ को नीति, कार्यक्रम तथा बजेटसम्बन्धी छलफल तथा अन्तरक्रिया कार्यक्रम काठमाडौँको लोकन्थलीमा सम्पन्न भएको छ । कार्यक्रममा काठमाडौँमा विभिन्न पेशा तथा व्यवसाय गरी बसोबास गरिरहेका लिखुपिके गाउँका बासिन्दाहरूको उपस्थिति रहेको थियो । गाउँपालिकाको आगामी वर्षको विकास योजनाबारे विस्तृत जानकारी दिइँदै, सहभागीहरूसँग खुला छलफल गरिएको थियो ।
गाउँपालिकाका अध्यक्ष मिना कार्की बस्नेत लगायत अन्य पदाधिकारीहरूले आगामी वर्षका प्राथमिकता, योजना, र बजेटको रूपरेखाबारे जानकारी गराउँदै, स्थानीयवासीको सरोकारका विषयमा सुझाव लिएका थिए । सहभागीहरूले गाउँको पूर्वाधार विकास, शिक्षा, स्वास्थ्य, पर्यटन तथा रोजगारीका अवसर विस्तारमा केन्द्रित योजनाको माग गर्दै आफ्ना धारणा राखेका थिए ।
कार्यक्रमले काठमाडौँमा बसोबास गर्ने लिखुपिके बासिन्दाहरू र गाउँपालिकाबीचको सम्बन्ध सुदृढ गर्दै समावेशी र सहभागी विकासको आधार तयार गरेको सहभागीहरूको भनाइ थियो । गाउँपालिकाले भविष्यमा समेत यस्ता अन्तरक्रिया कार्यक्रमलाई निरन्तरता दिने प्रतिबद्धता जनाएको छ ।
Discussion about this post