सोलुदुधकुण्ड नगरपालिका २ वेनीको सार्वजनिक सुनुवाई : पौने ५ करोडको योजना सञ्चालन

जेठ २४, सोलुखुम्बु । सोलुदुधकुण्ड नगरपालिका वडा नम्बर २ बेनी चालु आर्थिक वर्षमा पौने ५ करोडको योजना संचालन भएको छ । वडा कार्यालयको सभाहलमा सम्पन्न चालु आर्थिक बर्षको सार्वजनिक सुनुवाई कार्यक्रममा वडा अध्यक्ष ङवाङ ठिले शेर्पाले यो बर्ष वडा र नगर स्तरीय समेत गरि ४ करोड ७३ लाख ३८ हजार रुपैँयाको योजना संचालन भएको र वडा स्तरीय योजनाको काम सम्पन्न भईसकेको जानकारी दिनु भयो ।
नगरप्रमुख नाम्गेल जाङ्बु शेर्पाको प्रमुख आतिथ्यता तथा रेडियो एभरेष्टको सहजिकरणमा भएको कार्यक्रममा वडा अध्यक्ष शेर्पाले आफ्नो प्राथमिक्तामा शिक्षा, स्वास्थ्य, कृषि र सडक रहेको भन्दै सबै क्षेत्रमा उल्लेख्य प्रगति भएको विवरण पेश गर्नु भयो । वहाँले कोशी प्रदेशकै पहिलो कृषि यान्त्रिकरण गर्ने वडा बेनी नै रहेको भन्दै शिक्षा र स्वास्थ्यमा नतिजा आउने गरि काम भईरहेको बताउनु भयो । सो क्रममा नगर प्रमुख शेर्पाले ८ बर्षको अन्तरालमा बेनीको मुहार पुरै फेरीएको भन्दै गुणस्तरीय सडक संजाल निर्माण गरिएको बताउनु भयो । वहाँले वडामा ५ करोडको हाराहारिमा पठाईएको बजेटले चौतर्फि विकास भएको धारणा राख्नु भयो । वहाँले पालिकाको कुनै पनि क्षेत्र र जातिलाई विभेद नगरि विकास बजेट परिचालन गरेको बताउनु भयो ।
कार्यक्रममा वडा सचिव रामदेव यादवले बर्ष भरिको सेवा प्रवाहको विवरण पेश गर्दै ७९ लाख बढि राजश्व संकलन भएको जानकारी गराउनु भयो । स्वास्थ्य चौकी प्रमुख आङल्हमु लामाले स्वास्थ्य क्षेत्रको उपलब्धि बारे वडाका जनतालाई खुलस्त पार्नु भएको छ । त्यस्तै जुनवेशी माविका प्रअ कुमार राउत र नमोबुद्ध आविका प्रआ शैकुमार विश्वकर्माले वडा अध्यक्षको नेतृत्वमा शिक्षा क्षेत्रमा भएको गुणात्मक परिवर्तनको चर्चा गर्नु भएको थियो । करिब ९० जना वडाका नागरिक अगुवा सहभागि कार्यक्रममा अधिकांश बक्ताहरुले नगर र वडाको नेतृत्वले जनपक्षिय काम गरेको र गुनासो गर्ने ठाउँ कुनै नरहेको बताएका छन् । उनीहरु नयाँ स्थानमा सडक विस्तारमा नगरपालिकाको ध्यान दिने पर्नु अपेक्षा प्रस्तुत गरेका छन् ।