सोलुदुधकुण्ड नगरपालिका ७ को सार्वजनिक सुनुवाई : गार्माको मुहार फेर्न लागि परेको अध्यक्ष शेर्पाको भनाई

जेठ २६, साेलुखुम्बु ।   सोलुदुधकुण्ड नगरपालिका वडा नम्बर ७ गार्माको चालु आर्थिक बर्षको भौतिक प्रगति शतप्रतिशत भएको छ । वडा कार्यालयको सभाहलमा सोमबार सम्पन्न सार्वजनिक सुनुवाईमा वडा अध्यक्ष सोनाम ग्याल्जेन शेर्पाले बार्षिक प्रगति विवण पेश गर्दै वडाका सम्पूर्ण योजनाको काम सम्पन्न भईसकेको जानकारी गराउनु भयो । रेडियो एभरेष्टको सहजिकरणमा भएको कार्यक्रममा वडा अध्यक्ष शेर्पाले आफुले भौतिक विकासका अलावा शिक्षा, कृषि र स्वास्थ्य क्षेत्रको विकास मार्फत गार्माको मुहार फेर्न लागि परेको बताउनु भयो ।

वडा अध्यक्ष शेर्पाले आफु निर्वाचित भएदेखि हालसम्म गरेको कामको भिडियो सामागृ समेत प्रस्तुत गर्दै शिक्षा र कृषि क्षेत्रमा भएको कामको नतिजा देखिन थालेको बताउनु भयो । वहाँले आफु ईमान्दार पुर्वक नागरिक सेवामा लागेको भन्दै अबको २ बर्ष भित्र गार्मालाई जिल्लाकै नमुना वडा बनाउने प्रतिबद्धता ब्यक्त गर्नु भयो ।

 कार्यक्रममा स्वागत मन्तव्य राख्दै वडा सदस्य भलाकाजी कार्कीले पारदर्शी रूपमा वडाले याेजनाहरू सञ्चालन गरेकाे बताउनु भयाे ।

यस्तै,

नगरपालिकाका योजना शाखा प्रमुख रामकुमार खड्काले नगरपालिका शुसासनमा अब्बल भएको भन्दै नागरिकको गुनासो सुन्नकै लागि सार्वजनिक सुनुवाई कार्यक्रम गरिएको बताउनु भयो । बर्ष भरिमा प्रवाह भएको सेवाको बारेमा जानकारी दिँदै वडा सचिव रमेश कार्कीले चालु आर्थिक बर्षमा ९ लाख ७३ हजार राजश्व संकलन भएको बताउनु भयो । स्वास्थ्य चौकी गार्माका ईन्चार्ज सरिता गजमेरले स्वास्थ्य सेवा प्रवाहको विस्तृत विवरण पेश गर्नु भएको थियो ।

राजैनैतिक दलका प्रमुख तथा प्रतिनिधि र समाजका अगुवाहरुको सहभागिता रहेको कार्यक्रममा अधिकांशले वडाले जनमैत्री काम गरेको भन्दै प्रशंसा गरेका थिए । प्रश्न र गुनासो भन्दा पनि सबैले वडा अध्यक्षको प्रशंसा गरेका थिए । उनीहरु अहिले भईरहेको विकासको रफ्ताराई निरन्तता दिए मात्रै सम्बृद्ध गार्मा बन्ने विश्वास ब्यक्त गरेका छन् ।