समाज सौहार्दपूर्ण बनाउन मेलमिलापकर्ताको महत्वपूर्ण भुमिका रहन्छ : उपाध्यक्ष विना राई

जेठ २७, सोलुखुम्बु । सोलुखुम्बुको नेचासल्यान गाउँपालिकाकी उपाध्यक्ष विना राईले समाजमा शान्ति र सौहार्द कायम गर्न मेलमिलापकर्ताहरुको भुमिका अत्यन्तै महत्वपूर्ण रहेको बताउनुभएको छ।

ग्लोबल एड्भोकेसी नेपालको सहजीकरणमा र गाउँपालिकाको आयोजनामा सम्पन्न तीन दिने “मेलमिलापकर्ताका लागि पुनर्ताजगी तालिम” को समापन कार्यक्रममा बोल्दै उपाध्यक्ष राईले समाजमा देखिने साना ठूला विवादहरु मेलमिलाप प्रक्रियामार्फत गाउँमै समाधान गर्न सकिने विश्वास व्यक्त गर्नुभयो।

उहाँले भन्नुभयो, “पहिला थोरै झगडा वा विवाद भए पनि जिल्ला अदालत वा प्रशासनसम्म जानु पर्ने अवस्था आउँथ्यो, तर अब मेलमिलापकर्ताहरुको सक्रियताले ती मुद्दाहरु गाउँमै सहज रुपमा समाधान हुन सक्छन्।” उपाध्यक्ष राईले मेलमिलापकर्ताहरुलाई अझ सक्रिय, संवेदनशील र निष्पक्ष भई कार्य गर्न आग्रह गर्नुभयो।

यसले स्थानीय तहमा शान्ति, सहिष्णुता र सामाजिक सद्भाव कायम गर्न मद्दत पुग्ने उहाँको भनाइ थियो। तालिममा सहभागी मेलमिलापकर्ताहरुले पनि तालिममार्फत आफ्नो ज्ञान र सीपमा निखार आएको अनुभव सुनाउँदै आगामी दिनमा अझ प्रभावकारी ढंगले काम गर्ने प्रतिबद्धता व्यक्त गरेका थिए। तालिममा गाउँपालिकाभित्रका विभिन्न वडाबाट मेलमिलापकर्ताहरुको उपस्थिति रहेको थियो।