सोताङमा अपांगता भएका व्यक्ति तथा परिवारका सदस्यहरुलाई कृषि सम्बन्धि ५ दिने आधारभूत तालिम

जेठ ३०, सोलुखुम्बु । सोलुखुम्बुको सोताङ गाउँपालिकामा अपांगता भएका व्यक्ति तथा परिवारका सदस्य हरुलाई कृषि सम्बन्धि ५ दिने आधारभूत तालिम प्रदान गरिएको छ । जेठ २६ गतेदेखि सुरु भएको तालिम शुक्रबार गाउँपालिका अध्यक्ष खिलराज बस्नेतको प्रमुख आतिथ्यतामा समापन गरिएको हो ।

तालिम अपाङ्गता रोकथाम तथा पुनःस्थापना कार्यक्रम अन्तर्गत राष्ट्रिय अपाङ्ग महासंघ कोशी प्रदेश, सामाजिक विकास मन्त्रालय कोशी प्रदेशको सहकार्य र सोताङ गाउँपालिकाको आयोजनामा तालिम संचालन गरिएको कृषि शाखा प्रमुख मोनिता पौडेलले जानकारी दिनुभयो । तालिममा १० जना सहभागी थिए भने तालिम कृषि शाखा प्रमुख मोनिता पौडेलसहित कृषि प्राविधिकहरूद्वारा सहजीकरण गरिएको थियो । तालिम अवधिभर सहभागीहरूले कृषि प्रणाली, रोग कीट व्यवस्थापन, विउ छनोट, मलखाद प्रयोग लगायतका विषयमा व्यवहारिक ज्ञान हासिल गरेका थिए ।

समापन समारोहमा गाउँपालिका अध्यक्ष खिलराज बस्नेतले अपांगता भएका व्यक्ति तथा परिवारलाई आत्मनिर्भर बनाउन यस्ता तालिमहरू महत्वपूर्ण भूमिका खेल्ने बताउनुभयो । तालिममा सहभागी कृषकहरूलाई ड्रम, हजारीया विउविजन, विषादी लगायतका कृषि सामाग्रीहरू वितरण गरिएको छ । सोताङ गाउँपालिकाले आगामी दिनमा पनि यस्ता सीपमूलक तालिमलाई निरन्तरता दिने प्रतिबद्धता जनाएको छ ।