खिजीदेम्बा गाउँपालिकामा हाइड्रोपावरको सामग्री चोरी गर्ने तीन जना पक्राउ

जेठ ३०, सोलुखुम्बु । ओखलढुंगाको खिजीदेम्बा गाउँपालिका–७ स्थित निर्माणाधीन एफोलो हाइड्रो पावर प्रा.लि. अन्तर्गतको प्रिसाईज हाईड्रो इन्जिनियरिङ कन्ट्रक्सन प्रा.लि. को क्याम्पबाट हाइड्रोपावर निर्माणमा प्रयोग हुने महत्वपूर्ण सामग्री चोरी गर्ने गिरोहका तीन सदस्य पक्राउ परेका छन् । जिल्ला प्रहरी कार्यालय ओखलढुंगाका अनुसार पक्राउ पर्नेहरूमा खिजीदेम्बा गाउँपालिका–८ निवासी २६ वर्षीय बिमल कार्की, १८ वर्षीय सुरज बि.क. र एक जना नाबालक रहेका छन् ।

प्रहरीका अनुसार जेठ २७ गते राति उनीहरूले वेल्डिङ लिड, ड्रिल मेशिन, ग्रिन्डर मेशिन, तथा तार लगायत करिब ४ लाख २६ हजार ९ सय रुपैयाँ बराबरको सामग्री क्याम्पको कम्पाउण्डबाट चोरी गरेका थिए । जिल्ला प्रहरी कार्यालयका सूचना अधिकारी एवं प्रहरी निरीक्षक विजय कार्कीले दिएको जानकारी अनुसार, चोरीका सबै सामानसहित उनीहरूलाई बिहीबार आफ्नै घरबाट पक्राउ गरिएको हो । हाल जिल्ला अदालत ओखलढुंगाबाट पाँच दिनको म्याद थप गराई उनीहरूविरुद्ध आवश्यक अनुसन्धान प्रक्रिया अघि बढाइएको प्रहरीले जनाएको छ ।