असार २, सोलुखुम्बु । खोटाङको ऐसेलुखर्क गाउँपालिकालाई पूर्ण खोप सुनिश्चितता गाउँपालिका घोषणा गरिएको छ । आईतबार एक औपचारिक कार्यक्रमका बीच गाउँपालिकामा रहेका सम्पूर्ण लक्षित बालबालिकालाई आवश्यक सबै खोप दिइसकेपछि यस पालिकालाई पूर्ण खोप सुनिश्चित पालिका २०८१ घोषणा गरिएको हो । गाउँपालिकाका सात वटै वडामा १६ महिना देखि ५९ महिनासम्मका बाँकी रहेका ५५३ जना बालबालिकालाई खोप लगाइसकेपछि यो उपलब्धि हासिल गरिएको स्वास्थ्य शाखा प्रमु सचिन श्रेष्ठले जानकारी दिनुभयो । उहाँका अनुसार पालिकाभरी घरधुरी सर्वेक्षण गर्दा कुनै पनि बालबालिका खोप पाउनबाट बञ्चित नभएको तथ्यांकका आधारमा सबै प्रकृया पुरा गरेसँगै पूर्णखोप गाउँपालिका घोषणा गरिएको हो ।
गाउँपालिका अध्यक्ष तथा पालिका खोप समन्वय समिति संयोजक गिरेन्द्र बहादुर राईको अध्यक्षतामा भएको पूर्ण खोप सुनिश्चितता गाउँपालिका घोषणा कार्यक्रममा जिल्ला समन्वय समिति प्रमुख एवंम जिल्ला खोप समन्वय समिति संयोजक सन बहादुर राई, जिल्ला समन्वय समिति उपप्रमुख सुरेस तामाङ, गाउँपालिका उपाध्यक्ष राजेशकुमार राजभण्डारी, स्वास्थ्य कार्यालय खोटाङका प्रमुख जीवन प्रसाद चौलागाई, इलाका प्रहरी कार्यालय प्रमुख, वडाध्यक्षहरु, पालिका स्वास्थ्य शाखाका कर्मचारी तथा स्वास्थ्य स्वयंसेवीहरुको उपस्थितिमा पूर्णखोप सुनिश्चितता पालिका घोषणा भएको जनाइएको छ ।
यस घोषणाले ऐसेलुखर्क गाउँपालिकाले सार्वजनिक स्वास्थ्यको क्षेत्रमा एक महत्वपूर्ण फड्को मारेको संकेत गर्दछ। साथै, खोप सुनिश्चिततामार्फत बालबालिकाको स्वास्थ्यमा सुधार ल्याउने लक्ष्यतर्फ समेत महत्वपूर्ण योगदान पुर्याएको छ ।
Discussion about this post