थुलुङमा पोष्टमार्टम भवन बन्यो, तीन पालिकाका नागरिकलाई सहजता

असार २, सोलुखुम्बु । सोलुखुम्बुको थुलुङ दुधकोशी गाउँपालिकामा पोष्टमार्टम भवन निर्माण गरिएको छ । जसले अब स्थानीय नागरिकलाई जिल्ला अस्पताल धाउनुपर्ने झन्झटबाट मुक्ति दिनेछ । गाउँपालिकाले ११ लाख रुपैयाँको लागतमा उक्त भवन निर्माण गरिएको गाउँपालिकाले जनाएको छ ।

गाउँपालिकाका अध्यक्ष असिम राईले सोमबार एक कार्यक्रमका बीच भवन उद्घाटन गर्दै अबदेखि थुलुङ दुधकोशी गाउँपालिकासहित छिमेकी पालिका सोताङ र महाकुलुङका नागरिकहरूलाई पनि पोष्टमार्टम सेवा सहज रूपमा उपलब्ध हुने बताउनुभयो । “अब कुनै पनि अप्रिय घटनापछि शव परीक्षणका लागि सदरमुकाम जानुपर्ने बाध्यता हटेको छ,” अध्यक्ष राईले भन्नुभयो, “स्थानीय स्तरमै सेवा उपलब्ध भएपछि समय, खर्च र झन्झट पनि घट्नेछ ।”

स्थानीय अस्पतालमा नै पोष्टमार्टम सेवा सुरु भएसँगै यस क्षेत्रका नागरिकले सहज, छिटो र सुलभ सेवा पाउने अपेक्षा गरिएको छ । यो सुविधाले गाउँपालिकाभित्र स्वास्थ्य सेवा सुदृढ गर्न थप टेवा पुग्ने विश्वास व्यक्त गरिएको छ ।