महाकुलुङमा दुई दिने एकीकृत प्रारम्भिक बाल विकास योजना तर्जुमा कार्यशाला

असार २, सोलुखुम्बु । सोलुखुम्बुको महाकुलुङ गाउँपालिकामा दुईदिने “एकीकृत प्रारम्भिक बाल विकास योजना तर्जुमा कार्यशाला” सम्पन्न भएको छ । गाउँपालिकाको अयोजना तथा चाइल्ड नेटवर्क फाउन्डेशन र सेतो गुराँस राष्ट्रिय बाल विकास सेवाको सहकार्य तथा सहजीकरणमा सोमबार दुई दिने उक्त कार्यशाला सम्पन्न भएको हो । “ठूलो पुल, भवन, मन्दिरमा थप लगानी होइन—प्रारम्भिक विकासमा लगानी“, र “प्रारम्भिक विकासमा लगानी, राष्ट्र विकासको थालनी“ भन्ने दुई मूल नारासहित कार्यशालाको आयोजना गरिएको हो ।

स्थानीय तहका सरोकारवालाहरूलाई एकीकृत प्रारम्भिक बाल विकास (ईपीसीडी) को अवधारणाबारे जानकारी दिने, बाल्यकालको सर्वाङ्गिन विकास सुनिश्चित गर्न आवश्यक योजना निर्माणमा स्थानीय तहको भूमिका प्रस्ट पार्ने, तथा आगामी आर्थिक वर्षको वार्षिक र आवधिक योजनामा बाल विकास क्षेत्रमा लगानी बढाउन प्रेरित गर्ने उद्देश्यले कार्यशाला आयोजना गरिएको सहकर्मी झलक राईले जानकारी दिनुभयो । सेतो गुराँस राष्ट्रिय बाल विकास सेवाका सिनियर सहजकर्ता रितिका ढकाल तथा जिल्ला कार्यक्रम अधिकृतसहितको टिमले कार्यशालालाई सहजीकरण गरेका थिए ।

कार्यशालाको क्रममा प्रारम्भिक बाल विकासका विषयमा काम गर्ने ११ सदस्यीय विषयगत समिति गठन गरिएको छ । यस समितिले शिक्षा, स्वास्थ्य, पोषण, सरसफाइ, कृषि र पशुपालन जस्ता क्षेत्रलाई एकीकृत गर्दै स्पष्ट अवधारणा निर्माण गर्नेछ। कार्यशालाबाट आगामी आर्थिक वर्ष २०८२÷८३ का लागि करिब १५ लाख रुपैयाँ बराबरको प्रारम्भिक बाल विकास योजनाको माग गरिने प्रतिबद्धता स्थानीय सरकार र सहकार्य संस्थाले व्यक्त गरेका छन् । कार्यशालामा सहभागी ३६ जनाले हस्ताक्षर गरी “गर्भावस्था देखि ८ वर्षसम्मका सबै बालबालिकाको सर्वोत्तम हित र सर्वाङ्गिन विकासको अधिकार सुनिश्चित गर्न स्थानीय सरकार, सेवा प्रदायक संस्था, विद्यालय, अभिभावक, शिक्षा, स्वास्थ्य, सञ्चार र नागरिक समाज समन्वयमा सक्रिय भूमिका निर्वाह गर्ने“ प्रतिबद्धता जनाएका छन् ।

गाउँपालिका अध्यक्ष सूर्य बहादुर राईको अध्यक्षतामा सम्पन्न उक्त कार्यशालामा उपाध्यक्ष सहित पाँचै वडाका वडा अध्यक्षहरू, वडा सचिवहरू, प्रशासकीय अधिकृत खरिधन राई, शिक्षा अधिकृत, पशु तथा कृषि शाखा प्रमुख, गैरसरकारी संस्था रिड नेपालका प्रतिनिधि, सेतो गुराँसका जिल्ला कार्यक्रम अधिकृत, सिनियर अफिसर, सहजकर्ता, स्थानीय विद्यालयका प्रधानाध्यापक, बाल क्लब प्रतिनिधि, विद्यालय मेन्टरहरू लगायत सरोकारवाला संस्थाका विशिष्ट उपस्थिती रहेको थियो । कार्यशाला स्थानीय तहमा प्रारम्भिक बाल विकासको विषयलाई नीतिगत रूपमा स्थापित गर्न महत्वपूर्ण कदमको रूपमा हेरिएको छ ।