सिद्धिचरण नगरपालिका २ को सामाजिक सेवा कार्यक्रममा नागरिकहरूको उत्साहजनक सहभागिता र प्रशंसा

असार २, सोलुखुम्बु । ओखलढुंगाको सिद्धिचरण नगरपालिका वडा नं. २, ठूलाछापद्वारा आर्थिक वर्ष २०८१/८२ का लागि विनियोजित ५० हजार रुपैयाँको बजेटबाट विभिन्न सामाजिक सेवा कार्यक्रमहरू सफलतापूर्वक सम्पन्न गरिएको छ। वडा अध्यक्ष बसन्त कट्वालका अनुसार, यस बजेटअन्तर्गत जेष्ठ नागरिकदेखि नवजात शिशु, सुत्केरी आमा र अपांगता भएका व्यक्तिहरूलाई लक्षित गरी कार्यक्रमहरू सञ्चालन गरिएको छ।

कार्यक्रम अन्तर्गत वडा नं. २ का २० जना जेष्ठ नागरिकहरूलाई अबिरमाला र सम्मानपत्र प्रदान गरी सम्मान गरिएको छ। त्यस्तै, ३४ जना नवजात शिशुहरूलाई बेबी स्याम्पु, साबुन लगायतका स्वास्थ्य सामग्री वितरण गरिएको छ। सुत्केरी महिलाहरूका लागि ३५ जनालाई सरफ, ब्रस, मञ्जन, साबुन र स्याम्पु जस्ता दैनिक प्रयोगका सामग्री उपलब्ध गराइएको छ । अपांगता भएका २१ जनालाई स्वास्थ्य सामग्रीसहित सम्मान प्रदान गरिएको वडा कार्यालयले जनाएको छ । साथै, मिलिजुली समूहलाई कागजात सुरक्षित राख्नका लागि १ थान (बाकस) प्रदान गरिएको छ ।

स्थानीय सामाजिक, स्वास्थ्य तथा विकाससम्बन्धी मुद्दाहरूमा छलफल हुने गरी अन्तरक्रिया कार्यक्रम पनि सञ्चालन गरिएको छ । आगामी वर्षका लागि प्राथमिकतामा पर्ने योजना छनोट गर्न स्थानीय सरोकारवालाहरूसँग छलफल गरिएको छ। उक्त कार्यक्रमहरू वडा अध्यक्ष बसन्त कट्वालको संयोजनमा स्थानीय सहयोग र सहभागितामा सफलतापूर्वक सम्पन्न भएका हुन् । स्थानीय बासिन्दाहरूले यस्ता कार्यक्रमहरूले समुदायमा सकारात्मक सन्देश प्रवाह गरेको र समावेशी विकासतर्फ टेवा पुगेको प्रतिक्रिया दिएका छन्।