सोलुखुम्बुमा बस दुर्घटना, २ जना घाइते

असार ०६, साेलुखुम्बु ।    सोलुखुम्बु जिल्लाको सोलु दुधकुण्ड नगरपालिका–७, माथिल्लो साल्मे स्थित सिद्धिचरण लोकमार्गमा यात्रुबाहक बस दुर्घटना भएको छ। आज बिहान करिब ४ः०० बजेको समयमा सल्लेरीबाट काठमाण्डौंतर्फ जाँदै गरेको बागमती प्रदेश ०१–००६ ख ५५८२ नम्बरको श्री उग्रचण्डी बस अनियन्त्रित भई सडकमा पल्टिएको हो।

दुर्घटनाको जानकारी पाएलगत्तै जिल्ला प्रहरी कार्यालय सोलुखुम्बुबाट प्रहरी नायव उपरीक्षक मनोजित कुँवरको कमाण्डमा टोली खटिएको थियो। बसमा चालक, सहचालक, कन्टेक्टरसहित ७ जना सवार थिए।

दुर्घटनामा सिन्धुली फिक्कल गाउँपालिका–२ निवासी करिब ३२ वर्षीय बस चालक होम बहादुर लुङ्गेलीको दुवै खुट्टाको घुँडामा र देब्रे हातमा सामान्य चोट लागेको छ। त्यसैगरी, रामेछाप लिखु गाउँपालिका–७ निवासी करिब ३१ वर्षीय कन्टेक्टर तारा बहादुर बुढाथोकीको दाहिने हातका औलाहरूमा चोट लागेको छ।

घाइते दुवै जनाको जिल्ला अस्पताल फाप्लुमा उपचार भइरहेको छ। अन्य पाँच जना सकुशल रहेका छन्। बसको दाहिने भागमा क्षति पुगेको छ भने सडक अवरुद्ध भएको छ। बस हटाउने प्रयास जारी रहेको प्रहरीले जनाएको छ। दुर्घटनाको कारणबारे थप अनुसन्धान भइरहेको जिल्ला प्रहरी कार्यालय सोलुखुम्बुले जनाएको छ ।