फाप्लु–बेनी–लिखुपिके सडकको स्तरोन्नति कार्य तीव्र, विभिन्न पूर्वाधार योजनाका लागि करोडौँको बजेट विनियोजन

असार ६, सोलुखुम्बु । सोलुदुधकुण्ड नगरपालिका–४ फाप्लुबाट बेनी हुँदै लिखुपिके जोड्ने सडकको स्तरोन्नति कार्य निरन्तर रूपमा अगाडि बढिरहेको छ । नगर क्षेत्रभित्रका पूर्वाधार योजनाहरूलाई प्रभावकारीरूपमा अघि बढाउनका लागि शहरी विकास मन्त्रालय, खानेपानी तथा ढल व्यवस्थापन विभाग, तथा कोशी प्रदेश सरकारसँग निरन्तर समन्वय तथा पहल गरिएको नगर प्रमुख नाम्गेल जाङ्बु शेर्पाले जानकारी दिनुभयो ।

नगरप्रमुख शेर्पाका अनुसार विभिन्न निकायहरूसँगको पहल र समन्वयको परिणामस्वरूप विभिन्न योजनाका लागि बजेट विनियोजन गरिएको छ । शहरी विकास मन्त्रालयमार्फत फाप्लु–बेनी–लिखुपिके सडक स्तरोन्नतिको लागि ३ करोड रुपैयाँ र जन्तरधाप–टाप्टिङ सडकका लागि १ करोड ५० लाख रुपैयाँ विनियोजन भएको छ । त्यस्तै, खानेपानी तथा ढल व्यवस्थापन विभागमार्फत सल्लेरी ढल निर्माणको लागि ३ करोड रुपैयाँ तथा निर्वाचन रणनीतिक सडक योजनाअन्तर्गत सल्लेरी–स्यालगुडी–माप्य हुँदै खुम्बु जोड्ने सडकको लागि पनि ३ करोड रुपैयाँ बजेट छुट्याइएको जनाइएको छ ।

यसैगरी, कोशी प्रदेश सरकारअन्तर्गतको भौतिक पूर्वाधार मन्त्रालयमार्फत—नगरपालिकाको पहलमा—फाप्लु–बेनी–लिखुपिके सडकका लागि १ करोड रुपैयाँ, सल्लेरी–तामाखानी हुँदै लिखुपिके जोड्ने सडकको लागि १ करोड रुपैयाँ विनियोजन गरिएको छ । एशियाली विकास बैंकको आर्थिक सहयोगमा फाप्लु–रिङ्मु–टाक्सिन्दु–नुनथाला हुँदै खुम्बु जोड्ने कालोपत्रे सडकका लागि करिब ७ करोड रुपैयाँ बराबरको बजेट समेत शहरी विकास मन्त्रालयमार्फत कोशी प्रदेश सरकारको भौतिक पूर्वाधार मन्त्रालयको ‘रातो किताब’ मा समावेश गरिएको नगरप्रमुख शेर्पाले बताउनुभयो । नगरपालिकाले दिगो विकासका लागि आवश्यक पूर्वाधार योजनाहरूमा प्रथमिकता दिँदै योजनाबद्धरूपमा कार्य अगाडि बढाइरहेको बताइएको छ ।